Ka jingjia ha ka shnong Lower Teksragre kaba hap ha thanat Damal Asim ha Dadenggre ha ka 25 tarik Jylliew ha kaba kawei ka kynthei ka la shah shoh bad sympat ha la ki bahaïing hasem hapdeng ka jingpeitkai jong ki nongshong shnong ka la wanrah ïa ka jingbitar ha kiba bun. Ngim lah ban mutdur ba ki shynrang kin leh haduh katto-katto ïa ka kynthei ha kane ka juk. I kumba kito kiba la shoh la dat ki dang im ha ka juk jong ki ‘riewkhlaw bad ym ha ka spah snem ba 21. Kaba kham I jah burom ka long ba ki ‘riew rangbah, ki kynthei bad ki samla kiba la ïalum ha kato ka jaka ki khlem nud ban leit pynsangeh ïa kito ki la shoh ïa katei ka kynthei. Ha ka jingshisha, lada ka la leh ïa kano-kano ka jingbakla, la dei ban aiti sha ki pulit ne ban bishar ha kawei pat ka rukom bad ym shu leh ‘riewkhlaw kumto kaba la thad rong ïa ka shnong, ka thaiñ bad ka jylla baroh kawei.
Hynrei kiba kum kitei ki jingjia kim dei satia ki bathymmai ne kiba lah ban ym jia shuh. Ngi kynmaw ba ha ki snem kiba mynshwa, ki longïing longsem ki la duh noh ïa la ki baieid bathoiñ ha ka jingshah bom shah tied ha u paidbhur na ka daw ba ki la shah suba bad kynnoh ba ki dei kita ki ‘men ai ksuid lane ki nongri thlen. Ka long shisha kaba I sang pap ban peit ïa kiba kum kine ki jingjia. Kin don kiba thap kti haba ki ïohi ïa kine ki jingjia, hynrei ngim tharai ba kin ïakmen bad risa lada ka wan jia ha ïing ha sem jong ki. Ngim dei ban pynshlur ïa kine ki kam ‘riewkhlaw namar ka lah ban wan jia ha ki ïing ki sem jong ngi ha kano-kano ka por namar ngim lah ban tip ïa ka jinglong jong ki briew mynta. Hooid, ngi im ha kata ka juk stad, juk shai, tangba ki don pat kiba dang leh ‘riewkhlaw bad kiwei ki shu ïa bud ïa ki khlem tip ïa ka sdang ka kut.
Katei ka jingjia ha ka shnong Teksragre ka wanrah ruh ïa ka jingkylli ba shano ka jah kata ka jingtip briew? Ynnai pat ïakren ïa kata ka jingtip blei. Kiba dang tip briew kin ym shlan ban leh haduh katto-katto lane ban shim ïa ka jingim jong kiwei. Kiba la tip blei kin ïaid da ka burom ka akor wat pyrshah ïa kito kiba la tip pylleiñ ba ki la leh ïa ki kam sniew. Ngi don ïa ki pulit kiba dei ki nongpyntreikam ïa ka aiñ, bad kiba tip briew bad tip blei kin jin da la khot ïa ki pulit ba kin kem bad tohkit bad ym ban rai hi dalade ba u A ne ka B ki dei ki ‘riewsniew bad kim don hok ban ïasaid ne ban leh kumno-kumno, bad ki dei ban shu pdiang beit ïa ka rai jong u paidbhur. Lada ka long ha kane ka dur, ngim donkam shuh ïa kita ki pulit ne ki ïingbishar ban tohkit ne bishar. Ailad beit ïa u paidbhur ba un leh katba u mon. Hynrei lada ka long pat ha kata ka rukom, shano ngin ïa poi?
Haduh mynta, ki pulit ki la kem ïa hynriew ngut ki briew kiba la donkti ha katei ka kam ban shoh ban dat ïa katei ka briew, bad kine ki dei ki bahaïing hasem jong ka hi. Ki bahaïing hasem kiba kumno kita ki bym don shuh ïa ka jingïatiplem? Ha ka jingshisha, kum kita ki bahaïing hasem ki la dei ban kham sngewthuh bha ban ïa kiwei. Ki la dei ban ïakren da ka ktien kaba shai bad ym ban ktah kti. Kim don hok hi ruh ban ktah kti wat lada ka dei ka bahaïing hasem jong ki. Ngi kyrmen ba ki pulit kin tohkit bniah halor katei ka jingjia khnang ba ka ‘chargesheet’ kan long kaba khlaiñ bad ka jingmudui kaba kin ai sha ka ïingbishar kan ïeng skhem. Lada ka long kumta, khlem pep ka jingpynsaja pyrshah ïa ki kan long kaba khlaiñ bad ka ban long ruh kum ka nuksa ïa kiwei kiba don ïa ka jingmut kum ki ‘riewkhlaw.
Ngi kyntu ruh ïa ki nongshong shnong ba kim dei ban shu long tang ki nongpeit kai haba ki ïohi ïa kiba kum kitei ki jingjia. Ha kane ka juk, ha ka jaka ban ïarap ïa ki lanot, ki briew ki la sngewtynnad ban sei shwa da ka ‘Mobile Phone’ bad ring dur ïa ka jingngat ki lanot ha ka apot sepsngi. Hooid, teng-teng ki don ki jingjia ba yn hap ban ring dur namar kato ka dur kaba la ring kan long kum ka sabut hakhmat ka aiñ. Hynrei ym donkam ïa baroh ba kin ring. Yn hap ban mareh ban ai jingïarap ruh ïa ki lanot. Ka long ka jinglehnohei ïa ka jinglong briew lada ngi shu peit kai bad ieh ïa ki lanot ba kin ïa ksaid ban ring mynsiem. Ynnai ïa klet ïa ka jingdonkam ban ïarap iwei ïa iwei pat. Long kiba kloi ban mareh bad kner ïa ki kti na ka bynta ki lanot. Ban shu long tang kum ki nongpeit kai ka dei ka kam kaba suk. Hynrei kaba kham jynjar tangba kaba ai jingmyntoi ka long ban klet noh ïa ka jingpeit kai bad ban mareh sha ki lanot bad ban ai ïa la ka kti kamon ka kti kadiang.
