Bertina Lyngdoh
La buhrieh ïa phi,
Ha ki tyngsop la sop ïa phi;
Kaei ban tip,
Kaei ka jingshisha jong phi.
Uei mo uba kumne phi long,
Na ka jingbha sha ka jingsniew phi spaiñ phi spong;
Phim tieng phim riej wat ïa ka burom,
Phim kheiñ wat i’u ba biang ne ba duna.
Katba phi dang don ryngkatlang,
Hangta ruh jingkmen kyrhai;
Ynda la troiñ bad bamduh na shapoh,
Hangta khih pisa bad mynsiem ka khuslai.
Te kumne shi kumne,
Phi buhrieh ïalade;
Na ki khmat ba ïohi paw,
Ruh na u paid ba bun balang.
Ko hynmen ko para, une keiñ u dei u nongshun ka imlang sahlang. Haba ïoh, u long u paralok uba bha tam, ynda haba duh pat u kylla long u nongshun. Une u dei uta ha kaba bun ki khynnah samla ki ngop bad kylla sniew ha u. Ha kine ki sngi mynta, sngewsih ban ïohi ba ka jylla jong ngi ruh ka la kynrei bad jyllei ha une u nongshun. Une u don ïa ka bor ban pynkyrni na ka shisien sha ka arsien bad nang bunsien. Ban shim wat ïa ki mynsiem briew mynsiem mrad ruh kim salia, namar ba la trei borbah ka bih jong u. Une u jait pynbuaid um pynsniew tang ïalade shimet hynrei wat ha ïing ha sem, ki paralok parajor, ruh ka imlang sahlang. U dei ruh u jait jingthaw uba pynshlur ïa ki kam sniew, kum ka kam tuh kam thiem, ka kam thok, bad ka jingdie noh ïa ki jingdonkam. Kane ka jait jingsniew, kam dei tang U, uba ngop ha u, hynrei wat Ka ruh ka la ngop ha u. Shisien bala ngop ha u, ka nam sniew ruh ym lah lait namar katta nang dih katta nang bang bad haba ym don lad shuh ban ioh, katta ka mynsiem ka nang kem ding. Kumta haba ka ding ka la klang bha khlem pep ïoh ruh ïa ka nam sniew. Une u dei uta u jingdih buaid uba ki khot u Drok. Une keiñ u dei u nongshun ka imlang sahlang ha kaba bun ki ngop bad sniew ha u.
Namarkata, ko ki hynmen ki para, kiar na une u jait jingdih uba sniew. Wat shim ba u dei uta uba pynjah jingkhuslai namar une u dei tang shipor bad u long thik kum u lok ba shet kylla. Kumba long ki briew bad paralok bym shisha, une ruh u long kumta hi. Wat tahmatïong la ka longrynïeng da u Namding uba pynjot ïa ka imlang sahlang hi baroh kawei. Im bha ban bha ka lawei ka pateng ka ban bud.
