D H Kharkongor
U Blei uba stad shisha shisha. Uba stad naba wat lada u ai ïa ngi shijur ki khmat lem bad shijur ki shkor pynban u ai pat de ïa ngi thik tang kawei ka shyntur, kaba lem ruh thik tang bad uwei u thylliej. Uba stad wei ba u da buh pat ruh ïa ki shijur ki khmat lem bad ïa ki shijur ki shkor ha ka jaka kaba kham halor ban ïa ka shyntur, kaba lem bad u thylliej. Kaba katno tam ynda u buh syndon ïa ka ‘jabieng’ ha ka jaka kaba halor jong ki. Mutdur hi ma phi kaei ka ban jia ïangi lada jia ba ngi don haduh shijur u thylliej.
Nga ngeit phin kubur lem bad nga ba ka long kaba da eh shisha shisha ïa ngi ba ngin lah ban sharai ïa la ki jong ki rymmiang shyntur lane ba ngin lah shisha ban tehlakam ïa la u jong u ‘thylliej’. La ngi ïai pyrshang pynban ngi shem ba u thylliej u jong ngi u kum ïaibtuit phlar – shi – phlar, ynda haba ïaitynjuh ïa u. Kumta wei ba ngi dang kum ïohi bad ngi dang kum ïohsngew ba u bapli un dang ïaibtuit. Un dang ïaibtuit hi ruh wei haba u ïai don ha ka jaka kaba sngem lynter.
Dang shen ngam lah kiar khlem da ïohsngew kyndiang ïa ka jingïakren ïa khana, halor ka mat lane ka phang kaba ngam ju kwah ban ïa shim bynta. Ñiuma nga ïoh sngewkyndiang wat lada ngam kwah ban shah shlor. Kata ka dei ka ‘jingngeit’ (faith) lane ka ‘niam'(religion). Ka bynta lane ka mat kaba dei kawei na ki daw bah jong ka jingsngew ïapher wat hapdeng ka jingïalong kawei ka jaitbynriew. Ngam lah khlem da ïohsngew kyndiang wei ba ngi ïa don lang ha ka juh ka kali, kaba sha ka juh ka jingleit-jingwan. Ka mat kaba lehse ki kum ïakren ïa khana na ka daw jong kane ka ‘Puja’ bad ruh na ka daw jong ka jingïohlad ban suhthied, hapoh jong ki, ka mynsiem sngewïapher jaitbynriew.
Katba nga nang heh nang san ba katta ruh nga nangkyiar rai-maw rai-dieng na kaeikaei kaba ïadei bad ka jingngeit lane ka niam bad ruh na ka jingïapher jaitbynriew. Ynda kumne mynta ngam don shuh ïa ka jingsngewïapher jaitbynriew bad wat ïa ka jingsngewïapher ‘niam’. Ha nga hi shimet baroh u ‘jaitbynriew’ u dei hi u ‘khunbynriew’ (human being). Te kumta la ïano ïano ruh ngam ju mlien ban kylli ïa ki ha kano ka niam lane ka jingngeit, ki don. Wat hapdeng para ma ngi ruh ngam ju kwah ban tip thikna lada ki dang don ha ka ‘Niamtynrai’ lane ki lah long ‘Kristan’. Ha ka jingïadei bad ka jinglong ‘Kristan’ ba ngam ju kwah pat de ban tip ha kano ka ‘kynhun balang Kristan’ (Denomination) ki don. Kumta ngam ju sngewtynnad ba kiwei kin kylli kin pyrthew ïa nga la nga dang don ha ka ‘Niam Tynrai’ lane nga lah long ‘Kristan’. Haba ngam lah kiar shuh nga shu pynshai ïa kiba nga dei itai Khasi tang ba bym ngeit shuh ïa ka ‘kñia’ ka ‘khriam’ lymne ïa ka ‘shat ka kheiñ’. Ngam ju pynshong nongrim ruh de ha kata ka ‘bok’ ka ‘nusip’. Katba ha ka jingïadei bad kata ka jinglong ‘Kristan’ nga shu pashat beit ha kiba kin bishar hi ma ki la ki ‘iohi’ ne em ïa uta u ‘Khrist’ ha ka jingim ka jong nga ,kaba man la ka sngi.
Ïa ki ‘buaidniam’ ba shongshit lane sngewsarong ïa la ka jong ka kynhun balang Kristan (Christian Denomination) nga shu jubab beit noh ba nga te nga don ha ka ‘balang’ (Denomination) ka jong uto uwei u ‘runar’ uba shah sahnarphna ryngkat lem bad u ‘Jisu Krist’, hangta ha Lum Golgatha. Uto uba dumok lane sneng ïa uto uwei pat de u ‘dakaid’ uba kum kren beiñ bad kum tynjuh bakla ruh de ïa u Jisu uba U Blei. Uto uba sakhilut ïa kiei kiei baroh kiba u Jisu u mad u shem naduh kato ka khyllipmat kaba la tian bishar ïa U (Jisu) ha khmat u Pilat tad haduh ka jingshah sahnarphna. Uto uba kubur(admit) lane phla (confess) shem mynsiem ïa la ka jong ka jingbymman lem bad ka jingshonghok shongñia ba un shah pynsajia, da kaba shah sahnarphna, namar kata ka jingim bymman ka jong u. Uto uba sngewthuh shaikdar ba u donkam ïa ka ‘jingmap-ei’ (mercy) kaba lem bad ka ‘jingai-ei (grace) ka jong u Jisu. Uto uba kylla kabamut (repent) bad uba kyrpadrit (plead) ïa u Jisu ba un sngewbha ban kynmawlem ïa u ynda U Jisu u la poi ha ‘Paradise’. Uto uba, ha kata hi ka juh ka khyllipmat, U Jisu u kren shaikdar lane pynthikna (ha uta u ‘dakaid’) ba ha kata hi ka juh ka khyllipmat un don lem bad U (Jisu) ha Paradise.
Ka dei ka jubab kaba pynsngewthuh shai ïa kiba ngam kwah ban ïakren ïa khana, kat ban poi ban ïataiñia, (argue) bad ki halor ka ‘Baptisms’ lem bad ka ‘Sacrament’ lane halor jong kano kano ka ‘Denominational Doctrine’. Ka jubab ka bym pynksan ïa la ka jong lymne pynrem pat de ïa ka jong kita kiwei. Ki la don ruh ki khep kiba nga shu jubab beit noh ba kam don jingmut ban ‘ïasaidpynksain’ ïa la ka jong ka ‘niam’ lane ka ‘kynhun Balang’ wei ba ngi dang ïashonglang ban ïa syllalang bad ïalehlang ruh (commit) ïa ka juh hi ki pop ki sang. U briew un dang ïaidei hi u briew, uba tlot bad uba tang pherwiak u lah kyllon khram. Ym don wat uwei ruh uba janai lane uba khlem pop ba kumta ym don wat tang kawei ruh ka kynhun Balang kaba janai.
