France, Risaw:
Katkum ki video ba la saphriang paidbah ha ki rynsan ‘Social Media’, la iohi ïa ki tiar ki tar kiba rem dor bad kiba la ngeit ba kin shong dor kumba 4.25 Million Euros, kiba la shah tuh na ki dukan die mar ba remdor ha ka por ba don ka jingiakhih paidbah. Hynrei, ha kane ka por la ong ba ïa kitei ki tiar- ki tar bad ki mar ba rem dor, la iohi ba ki don kiba la die ha ki iew- ki hat bad ba la die ruh ïa ki tang ha ka dor kaba tad.
Kitei ki jinglute kiba la iathuh, ki kynthup ïa kumba 3 Million Euro na kawei ka dukan Rolex ha Marseille bad 1.25 million euro na kawei ka dukan Louis Vuitton ha Bordeaux. Ki jingjia ki la pynmih ïa ka jingsngewkhia halor ka jingheh jong ka jinglute bad ka jingkynriah ïa ki mar tuh sha ki iew bym dei riti.
La iathuh ba ki mar rem dor kiba la suba ba ki la shah tuh ha ka por ba don ka jingkulmar, ki la paw ha ki surok, ha kaba la die ïa ki jingiwbih, ki pla kti jong ki nongshna dur, ki tiar pynitynnad bad kiwei kiwei ki mar kiba rem dor, ha ka dor kaba kham duna bha ïa ka dor ba ki ju die. Katkum ka jingkynnoh jong ki katto katne, don ki nongdie kiba ai dor kaba kham duna 90 percent. Katto katne ki video bad ki jingthoh ha ki social media ki la pynpaw ïa ka jingkynnoh ba la die ha surok, ha kaba la kynnoh ba ïa ki mar rem dor ba la shim na ki dukan la die ha ka dor kaba rem bha.
Hynrei ïa ka jingsdang bad jingshisha jong ki tiar shimet shimet kiba la pyni ha kine ki post ym shym la pynshisha da kaba laitluid.
