Washington, Risaw:
U Secretary of State jong ka United States, u Marco Rubio, uba dang don hapdeng ka jingwan jurip ba ar sngi sha India, u la pyrshang ban pynjem ïa ka jingkhuslai jong ka India, ha kaba ïadei bad ka jingbuh khajna jong ka sorkar u Trump bad ka jingkhang ïa ki Visa jong ka US, da kaba u la ong ba kitei ki sienjam, kim dei satia ban “pynshitom ïa ka India” lane ki dei kiba “thmu” ïa kano kano ka ri.
Haba ïakren bad ki nongthoh khubor ha India, u Rubio, u la pyntikna ba ka jingïateh kular khaïi- pateng hapdeng ka India bad ka US, kaba la don hapdeng ka jingïakren la palat shisnem shiteng mynta, ka dang sah sa da ki taiew, ym da ki bnai”.
“Nga pyrkhat ba ngi la iajan haduh katta katta. Ka rukom kaba ngan ong ka long, ngi dang sah da ki taiew, ym da ki bnai, kiba jngai na, nga pyrkhat, ban pyndep ïa ka. Nga pyrkhat ba 99% na ka kam ka la dep… Nga sngew ba nga long uba bha shibun ïa ka lynti kaba ka don,” u la ong.
U myntri kam bar ri jong ka US u la kam ba ka jingbyrngem jong ka Washington ban thmu ïa ki ri kiba thied ïa ka bor ding jong ka Russia da kaba buh dor haduh 100% ka lah ban ktah ïa ka jingïadei hapdeng ki arliang mamla bad ka India hynrei u la ban jur ba kane ka sienjam kam dei ban “pynmynsaw ïa ka India”.
Haba kdew sha ka jingpyllait ba la pynbna da u President Trump ha ka taiew ba la dep, u Rubio u la ong, “Ym don kawei ruh na kine ki jingsiew dor kaba thmu ban pynshitom ne pynmynsaw ïa ka India. Ki dei shi bynta jong ka polisi bar ri kaba kham jylliew kaba, sngewsih, ka kynthup ïa ka thma kaba dang iaid hapdeng ka Russia bad ka Ukraine kaba ngi kwah ban iohi ba kan kut noh.”
“Bad nga thikna ba phi la ïohi ïa ka ha ki lad pathai khubor jong ngi bad ka rukom synshar khadar jong ngi (ba), haba u President u la pynmih ïa kita ki jingpynlait bad um shym la pynjari ïa ki khajna kiba donkam katkum ka aiñ ba la mynjur da ka Congress jong ngi, u la ïoh ïa ka jingshah kynthoh namar ba u la leh ïa kata. Hynrei kawei na ki daw balei ba um shym la pynjari ïa ki ka long namar ba u sngewthuh ba kan ktah jur bha ïa ka jingïadei bad ka ri India.”
