“Kum ki shnong kiba lah don naduh ki por hyndai hynthai haduh mynta kata kum ka Mawmyrsiang, Tiewlieh bad Sohkhit kiba don hapoh ka Elaka Laitkroh Sirdarship, East Khasi Hills District, Meghalaya ki long ki shnong kiba lah kha roi stet bha ki nongshong shnong kiba hangne lah don ruh ki ïing Mane bapher bapher bad ki School ruh kumjuh; hynrei ki surok ktieh bad pum pum pat ban rung shapoh shnong ki long ki surok ba dang siang haduh mynta tang da ki maw lynruh lynram at them da ki maw heh khohruh khohram tyrdum tyrdam ngak shane ngak shatai tang ki thliew maw bad khyndew da ki phew snem mynta haduh mynta. La shem jingeh ki kali ban kit kum ïa ki nongpang suh khun la i kum ban shu khalor noh hapoh kali bad ki tymmen ba pang tlot doi doi ruh la i kum ban shu dkut mynsiem noh hapoh kali shuwa ban poi sha hospital. Hangne ym pat ju don kum ki Hospital, Dispensary ne kino kino ki jaka ai jingsumar ïa ki paid nongpang na ka liang ka sorkar (No governmental Health Care Facilities), te baroh ki jait kali ba ju kit nongpang ba hap ban phah sumar ïa ki nongpang sha kiwei pat ki jaka ba sha jngai kum sha Shillong bad kiwei kiwei pat ki jaka ai jingsumar, ki hap ban iaid lyngba tang na kane ka surok long katba long jia katba jia, kumta ka dor wai kali ruh ka kham rem ban ïa nujor bad kiwei kiwei ki jaka namar ki dri-ver ki ju ong ba ngi hap ban iaid tang da ka first bad second gear kata ka kham bam bun ka umphñiang. Te wat na ka liang ki paidbah bad ki nongsynshar shnong ruh ki la ju pyrshang wad jingïarap na baroh ki liang (all angles) na ka por sha ka por ban pynshna pynbha lem ïa kitei ki surok, pynban la shu poi tang ha ki jingkutlad bad shu dkut la ka dkut tang kumto hi kumba ju long kata da kaba shu ïai pyniewbih tang ha ki manifesto jong baroh ki por Election na ki por sha ki por. Na ka bynta ki jingmyntoi ki paidbah nongshong kham tam eh ban pynlait ïa ki paid duk bad nongpang na ki jingeh ha baroh ki liang, te kum u trai nongshong shnong ngam banse ban mih sha khmat ban kyrpad ïa kane ka sorkar ba don burom jong ngi ka MDA Govt. ba kan sngewbha ban shah shkor bad ïarap pynsiang rong lem noh kham kloi ïa kitei ki surok ba la kdew haneng, kata khnang ban pynlait na baroh ki jingeh ïa ki paidbah nongpang bad ki paid duk, bad ïa ki jingïarap ba sbun jong phi ngin ïai pyrto kum ka dak ka burom ïa phi junom, khublei shibun
Mr. A. Z. Sohtun (Laitkroh)
