Haba ieit ïa ka Ri, ngi dei ban ieit nyngkong eh shuwa ïa la ka rympei ïing i Mei i Pa. Nangta de ngi dei ban ieit ïa ka ka shnong ba kha. Ngi dei ban ieit de ïa ki para marjan marpa bad kumjuh ïa ki para briew baroh kiba long ki nongshong shnong ka thain bad ka Jylla hi baroh kawei. Ngi dei ruh ban don ka mynsiem ïarap para briew khlem niew shiliang khmat ïano ïano khamtam ki para marjan marpa bad ki para ri.
Haba ngi ieit ri ngi dei ban ieit ïa kiei kiei kiba don napoh ka ri. Ngi dei ban ri bad sumar ïa ka khyndew ka shyiap ba la buh u longshuwa u manshuwa. Ngi dei ban niewkor ïa ki dustur ki riti jong baroh ki jaitbynriew kiba shong ba sah hapoh ka ri India baïar. Ngi dei ban burom ïa baroh ki jait niam kiba don hapoh ka ri. Ngi dei ban tyngkai ia ki mrad ki mreng kiba don hapoh ka ri. Ngi dei ban pynneh pynsah ïa ki matti ki longshuwa u manshuwa.
Ngi dei ban tyngkai ïa ki dohum dohwah ym dei ban pynïap naphang ïa ki. Ngi dei ki nong India ngi dei ban ieit bad burom ïa ka ri India. Ngim dei ban pynpait pynpra ïa ka ri. Ka jingieit ri kam shong tang ba ngi ieit ïa ki para briew.
Ngi dei ban ieit bad tyngkai ïa ki sim ki doh, ki mrad ki mreng, ki lum ki wah, ki khlaw ki btap bad ïa ki kynja ba im baroh. Ngi dei ban ïeng pyrshah ïa kaba sniew bad ngi dei ban long kiba donbor don burom ha khmat ki briew. Namar ka akor bad kaba burom para briew ka long ka jingieit ïa ka ri bad ka jaitbynriew. Haba ieit ri ngi dei ban burom ïa ki tymmen ki san bad ïa ki kmie ki kpa.
C. B. Iawphniaw
