“Ban pynkiew pyntam, pynhiar pynduna ne pynsah kumjuh ïa ka bhah ai kam ai jam hapdeng ki Khasi – Jaiñtia bad Garo, ka shong ha ka jingstad jongka Expert Committee, ba la thung da ka sorkar jylla, tangba kano kano karai ne jingai jingmut jong ka Committee yn ym lah ban pyntrei kam shirta ne khlem jingkut. Dei ban bishar bniah biang man la ka shiphew snem.
Katkum ka Resolution No. PER/222/71/138 dated 12th January , 1972 jong ka sorkar Meghalaya, la thoh shai kdar ba ka jingai bhah ka dei tang naka bynta ka jingaikam aijam ha ki posts bapher bapher; kaba mut ha ka ktien nongwei “JOBS RESERVATION” bad ym shym kren ei ei shaphang ka jingai bhah na ka bynta ban ioh leit pule sha ki kyrdan ba kham shajrong ha ka pule ka puthi kum ka MBBS, Engineering, Agriculture, Animal Husbandry ne kino kino….Te kumno pat ka mih ka “SEATS RESERVATION ” na ka bynta ki Khasi Jaiñtia bad Garo. Kane kam lah ban long. Namar ka don ka jingïapher bak-ly-bak hapdeng ka “Jobs reservation ” bad ka “Seats reservation”.
Ki Seng Bhalang khamtam ka KSU kaba dei ban khmih ïa ka bha ka miat ki khynnah bad samla pule, ki dei ban buddien bha ïa kane ïoh ka por kan poi ba kan don ka jingdawa “seats reservation” wat ha ki skul bad kolej ha ka jylla. Te shano kane kan ïalam. Ha nga shimet, nga sngew ba ka Jobs reservation ka dei ban don, hynrei ka Seats reservation kam dei ban don. Haba phah ïano ïano ban leit pyntbit ha ki kyrdan pule bapher bapher kumba la kdew haneng, dei ban phah da kiba stad na ki ba stad tam, kiba bha na ki babha tam katkum ka `merit`.
Remy Phankon, Demseiñïong
