Thiruvananthapuram:
Ka sorkar Kerala hynnin ka sngi ka la pynbna ïa ka jingïarap pisa kaba T. 10 lak sha ka kmie jong u nongpynkhuid jaboh u Joy, uba la ngam jyllop katba u dang pynkhuid ïa kawei ka nala heh kaba la dap da ka ktieh bad ki jaboh ha ka nongbah Thiruvananthapuram ha kine ki khyndiat sngi ba la lah.
Ïa kane ka rai la shim ha ka por ba don ka jingïalang jong ka kynhun Myntri ba la pynïaid da u Myntri Rangbah u Pinarayi Vijayan ha ka nongbah.
Katkum ka jingthoh ba la wan na ka ophis treikam jong u Myntri Rangbah, ka kynhun Myntri ka la rai ban mang `.10 lak na ka Chief Minister’s Distress Relief Fund sha ka kmie jong u Joy.
Ïa ka met jong u Joy uba la jah katba u dang pynkhuid ïa ka nala Amayizhanchan ha ka 13 tarik, Naitung, ha kaba la lap noh ïa ka ha ka lah sngi U Blei.
Ïa ka met ïap kaba la pyut la lap na ka nala kaba don ha ka surok Pazhavangadi-Thakaraparambu-Vanchiyoor da ki nongtrei ba ju pynkhuid jaboh jong ka Corporation ha ka por ba la pynlong ïa ka jingwad ïa u ha ryngkat ka jingdon bynta lang kiba bun kiwei pat ki kynhun pylliat im.
Ha kaba ïadei bad kane, kiba bun na ki seng saiñ pyrthei, kynthup ka seng BJP, Youth League, bad Youth Congress, ki la pynlong ïa ka jingïakhih da kaba ïaid paidbah ban leit tur beit beit sha Thiruvananthapuram City Corporation hynnin ka sngi, ha kaba la pynshisha da kaba ong ba ka jingbym lah leh ei ei jong ka Corporation jong ka kynhun Left ha ka ban ïakren halor ki mat ba ïadei bad ka jingtehlakam ïa ka jingshlei jong ki jaboh ka la long ka daw ka ban shim ïa ka jingim jong u Joy.
