Vijayawada, Naitung:
U Myntri khynnah ka sorkar pdeng uba dei khmih ïa ka roi ka par jong ki thaiñ nongkyndong u Pemmasani Chandrasekhar u la ïathuh ba ka jylla Andhra Pradesh ka la ïoh T.2,545.50 klur kum ka bhah ba nyngkong hapoh ka Centre’s Viksit Bharat – Guarantee for Rozgar and Aajeevika Mission (Grameen) (VB-GRAM-G).
Ha ka jingthoh ba la phah, u Myntri u la ong ba T. 1,414. 16 klur na ka jingmang pisa la buh kyrpang na ka bynta ban siew ïa ka bai bylla, T.942.77 klur na ka bynta ki jingpynlut ha ki tiar bad T.188.50 klur na ka bynta ki jinglut jingsep ha ka liang ka synshar khadar.
U Chandrasekhar u la ong ba ka prokram VB-GRAM-G ka dei ka sienjam kaba kongsan ha ka jingpyrshang jong ka sorkar pdeng ban pynkhlaiñ ïa ka roi ka par ha ki thaiñ nongkyndong bad ban thaw ïa ki jingtei kiba neh ha ki shnong ki thaw.
U la ong ba ka sorkar jylla kan pyndonkam ïa ka pisa ban pynïar ïa ki lad kamai, ban kyntiew ïa ki jingdon jingem ba neh bad ban kyntiew ïa ki jingtei ha ki thaiñ nongkyndong ha AP.
U Myntri Rangbah u la ong ba kane ka skhim ka ïarap ruh ban thaw ïa ki lad kamai kiba neh lyngba ka jingpynroi ïa ki jingdon jingem jong ki paidbah.
U la ong ba ka sorkar pdeng, hapoh ka jingïalam jong u Myntri Rangbahduh u Narendra Modi, ka la buh hakhmat eh ïa ka roi ka par ha ki thaiñ nongkyndong, katba ïa kane ka skhim la pyntreikam ha baroh kawei ka ri hapoh ka jingpynïaid jong u Myntri ka tnat ki kam pynroi ha ki thaiñ nongkyndong ka sorkar pdeng u Shivraj Singh Chouhan.
U Chandrasekhar u la pynpaw ïa ka jingshaniah ba ka sorkar jylla ba la ïalam da u Myntri Rangbah ka jylla u N Chandrababu Naidu bad u symbud Myntri Rangbah u Pawan Kalyan kin pyndonkam ïa ka pisa ban pynsted ïa ka jingpynroi ïa ki jingtei ha nongkyndong bad ban pynmih kam ai jam.
Ka jingpyntreikam kaba paka ïa ka prokram, u la ong, kan ïarap ïa ka AP ban noh synñiang sha ka thong jong ka ri ban pynurlong ïa ka Viksit Bharat 2047.
