Mumbai, Naitung:
U Myntri Rangbah ka Maharashtra, u Devendra Fadnavis, u la shah kynthoh, namar ka jingkren jong u, kaba u kren pyrshah ïa ki liang pyrshah bad ki nongkynthoh, kiba la buh jingkylli ïa ka jinglong jingman jong ki projek jong ka sorkar jylla bad ïa ki polisi treikam jong ki.
U Myntri Rangbah u la ïada ïa ka Maharashtra State Road Development Corporation (MSRDC) hadien ba ka khyrdop jong ka lynti krem Missing Link kaba jrong 14 km kaba la kot sha ka 7 hajar klur tyngka ha ka surok bah Mumbai-Pune Expressway ka la shah pynjulor ha ka por ba nyngkong eh jong u slap uba jur.
U Fadnavis u la ong ba u sngew sarong ïa ki kam ba la pyndep hapoh ka jingïalam jong u bad u la pynpaw ïa ka jing-sngewskhem ba yn sa kynmaw ïa ka wat hadien arphew snem nangne shakhmat.
Haba ïadei bad ka jingshah kynthoh halor ka jingpynjot ïa ki bynta jong ka khyrdop jong ka Missing Link tunnel ha ka Mumbai-Pune Expressway, u la ong ba un pdiang ïa ka jingshah kynthoh hynrei un ym shah ïa ki jingkynthoh kiba, katkum ka jingong jong u, ki pynjah burom ïa ka Maharashtra.
“Ki briew ki bym don jingburom ne jingkyrshan ha la ki jong ki shnong, bad ki bym ithuh wat ïa ki ksew shnong jong ki, ki kynthoh ïa u Myntri Rangbah ka jylla ha ki social media. Kine ki dei ki Bhadeke Tatu — ki briew ba la ai wai kiba trei na ka bynta ka pisa bad kynthoh ïa kiwei,” ong u Fadnavis, da kaba byrngem ïa ki ba un bteng ïa ka jingai jingsneng ïa ki lada ki dang bteng ban leh kumta.
U nongïalam ka Shiv Sena (UBT) u Sanjay Raut u la ong ba ka rukom kren jong u Fadnavis bad pyndonkam ïa ki ktien kiba poh kyrdan na ka bynta ki liang pyrshah bad ki nongkynthoh ka pyni ïa ka jingsngewsih kaba jur bad ka jingsngew sarong jong u.
“Ka jingsarong jong u Myntri Rangbah kan jah noh tang hapoh ki sekhon ynda ka bor ka la jah na ki kti jong u. Da kaba peit ïa ka ktien jong u Myntri Rangbah ba mynta, ka Maharashtra ka donkam shisha ïa u Myntri Rangbah uba don ka kolshor bad uba lah ban kren bha. Kam shym don kano kano ka bynta ban pyntreikam kyrkieh ha Maharashtra, bad ngi kwah ban tip lada la don uba shah pynbor ban leh ei ei ha Maharashtra? Kumta ka liang pyrshah bad ki paidbah ki shah khanglad ban kren ïa la ka jong ka jingmut bad ban kynthoh ïa ka sorkar namar ka jingtrei bakla jong ki bad ki jingtei kiba la sah shrah,” ong u Raut.
Ka nongïalam ka Shiv Sena (UBT) ka Sushma Andhare ka la ong ba u Fadnavis u shim bakla ïa u kum uba dei na ka bynta ka ‘Maharashtra’ bad klet noh ïa ka jingïapher hapdeng ka seng synshar – sorkar bad ka Maharashtra.
“Ka sorkar ka wan bad ka leit, hynrei ka Maharashtra kum ka jylla ka dang sah. Ki briew ki kynthoh ïa ka seng synshar bad ïa u khlieh jong ka na ka bynta ki kam kiba la jyllei da ka jingbamsap, ki kam kiba duna dor, ym ïa ka jylla Maharashtra.
Ki nongshong shnong jong ka jylla ki siew khajna, bad lyngba kine ki khajna, la pynroi ïa ki jingtei. Kumta, ka dei ka hok jong uwei pa uwei u nongshong shnong ban ïoh ïa ka khajna bad ka jingkheiñ jong ka pisa, la ka long ba la pyndonkam na ka bynta ka jingpynroi kaba bha ne ka jingsiew bai lutksan bad ki komishon u Fadnavis um lah ban knieh noh ïa kata ka hok ba kongsan ban kylli jingkylli ïa ka Riti synshar ka ri India, kumta ngi khmih lynti lypa ïa ka jingshakri kaba bha, ym ïa ka jinglehbeiñ bad jingpyndonkam bakla.”
