Bengaluru, Naitung:
U Symbud Myntri Rangbah jong ka Karnataka, u G Parameshwara, u la ong ba ïa ka kam Special Intensive Review (SIR) ïa ki thup kyrteng jong ki nongthep vote la leh katkum ka jingbthah jong ka Election Commission of India (ECI) bad ka sorkar jylla kan don bynta beit ha kane ka kam. “Ki heh ba dei khmih ha ki kam elekshon ki pynïaid ïa baroh. Lada ki heh ki leh bakla, dei ban shim khia pyrshah ïa ki,” u la ong ha ki nongthoh khubor hangne hadien ba u la ïashim bynta ha ka jingïalang na ka bynta ki heh jong ka gram panchayat.
Ka sorkar jylla kam shym la pynmih kano kano ka jingbthah ha kaba ïadei bad ka SIR. “Ngi la pynbiang tang ïa ka bor briew kaba la wad da ka ECI. Ki BLO ki leit sha ki ïing ban sam ïa ki phom enumeration bad ki shim hadien. Lada ki sam phom da kaba shong ha kawei ka jaka, te ka long kaba bakla. Lada lap ïa kum kine ki jingjia, ka ECI ka dei ban leh eiei pyrshah ïa ki. Ka BJP ka dei ban pule bniah ïa ka rukom treikam ba la pynlong ha kiwei ki jylla,” u la ong.
U Dr Parameshwara u la ong ba ïa ki kyndon kiba ïadei bad ka SIR ym shym la thaw da ka jingïasyllok bad ka sorkar jylla. Ka ECI ka la rai ban pyndep ïa ka SIR exercise hapoh shibnai. Ka la pynmih ïa ki jingbthah sha ki heh sorkar ha kaba ïadei bad kane. Ka sorkar jylla ka dang pynjlan tang ïa ka jingkyrshan ban pynlong ïa ka SIR.
Halor ka elekshon sha ki ZP bad TP, u Dr Parameshwara u la ong ba u Myntri Rangbah ka jylla u DK Shivakumar u la dep ban pynbna ba shen yn sa pynlong ïa ka elekshon sha kum kine ki bor. Ïa ki tarik thep vote yn sa pynbeit ha kine ki sngi ban wan.
Halor ka jingïakhih jong ki nongrep na Tumakuru ban pyrshah ïa ka projek Hemavathi Express Canal, u la kyrshan ïa kane ka rai jong ka sorkar kmie bad ong ba yn ym lah ban pyndam noh mynta. U la ong ba la mang 900 klur tyngka na ka bynta kane ka projek bad shi bynta ruh la dep ban pynlut. Ha kane ka bynta, ym pat lah ban pynsangeh ïa ka projek.
U la ong ba palat 1.44 klur sla ki kot ki sla jong ka tnad khajna la pynkylla digital bad la buh bha ha ka e-khajane. Kane ka la long namar ka jingpyrshang jong u Myntri Rangbah ha kata ka por u S.M.Krishna ban pynrung ha ka kor kompiwtor ïa ki jingthoh halor ka khyndew ka shyiap.
