New Delhi, Nailar:
Shi taïew tam hadien ba ka la mih noh na Dhaka, ka Myntri Rangbahduh barim ka Bangladesh, ka Sheikh Hasina, ka la pynmih da ka jingthoh sha ki para nongshong shnong ha kaba ka la dawa ba ka dei ban don ka jingbishar ba hok.
Ïa katei ka jingthoh jong ka Hasina la pynmih da u khun jong ka ha rynsan ‘X’ ha ka Sngi Ba-Ar. Ha kane ka jingthoh, katei ka Myntri Rangbahduh barim ka la pynkynmaw ïa ka 15 tarik Nailar, 1975 ha kaba ka la duh noh ïa la u kpa, u Sheikh Mujibur Rahman, uba dei ruh u nongïalam uba la seng ïa ka Bangladesh, ha ka jingshah pynïap. Nalor jong u Rahman, kiba la shah pynïap ki long ki khun shynrang jong u bad ki kurim jong ki, ka longïing longsem u para jong u, ki paralok bad ki nongtreilang.
Shuh shuh haba kynthoh halor ka jinglong-jingman kaba mynta ha Bangladesh, ka Hasina ka la ong ba ki jingïakhih bad jingïakynad ki la ïalam sha ka jingïap briew – “ki samla pule, nonghikai, pulit, nongthoh khubor, nongtreimon sngewbha, ‘riew paidbah, nongïalam bad ki nongtrei ka seng Awami League, ki nongïaid lynti bad ki nongleit trei”.
“Na ka bynta kito kiba la duh noh ïa la ki baieid bathoiñ kumba nga la duh, nga phah ïa ka jingsngewlem. Bad na ka bynta kito kiba la donkti ban pynïap briew, ban wanrah ïa ka jingjot-jingpra, nga dawa ba dei ban don da ki jingtohkit bad ban kem bad ban pynsaja ïa ki,” la ong ka shithi ba la thoh ha ka ktien Bengali.
Lah ban kdew ba ki nongïakhih ym tang ba ki la pynkylla sohpdung ïa ka, ki la leit ruh ban thombor ïa ka ïing ka sem kaba ka la heh la san bad kaba la shah pynkylla sha ka ïing sah jingkynmaw bad ïa kaba la ju wan jngoh da ki nongïalam na kylleng ka pyrthei.
“Katta ka la kylla dpei…bad ki jingkynmaw kiba ngi don ruh, ki la kylla dpei…da ka jingpyni ba kim burom shuh ïa u Mujibur Rahman, uba la ïalam ban pynïoh jinglaitluid, jingithuh bad ka burom…ka snam kaba ki nongïakhun laitluid ki la theh ka la shah pyntngit noh…Nga dawa ba dei ban don ka jingbishar ba hok na ki para nongshong shnong,” la ong ka Hasina.
