New Delhi, Nailar:
Ka Myntri Rangbah jong ka West Bengal ka Mamata Banerjee ka la kynnoh ba ki nongbud jong ka seng CPI(M) bad jong ka BJP ki la donkti ban leit pynjulor ïa ka RG Kar Medical College and Hospital kaba ha Kolkata.
Hadien ka jingïakynduh bad u Lat, ka la pynshisha ba ki briew kiba nabar kiba rah ïa ki lama jong kine ki seng ki la donkti ha kane ka kam thombor ha ka por ba la don ka jingïakhih ban pyrshah halor ka jingshah leh beijot bad ka jingshah pynïap jong ka doktor.
“Nga la ïoh jingtip ba ki briew ba nabar, katto katne ngut ki nongbud jong ka seng saiñ pyrthei jong ka ‘Baam and Ram’ ki la leh ïa kane ka kam. Ki khynnah pule kim shym don bynta ei ei ban leh ïa kane ka kam. Nga pynrem jur halor kane ka jingjia bad nga la rai ban ai da ka jingpynsaja ban shah pynïap ha ki kti jong ka aiñ ïa ki runar kiba thombor bad pynïap ïa ka doktor,” la ong ka Banerjee.
