Bengaluru, Naitung:
U Lat ka jylla Karnataka, u Thaawarchand Gehlot, ha ka lah sngi U Blei, u la weng kam ïa u Chairman jong ka Karnataka Public Service Commission (KPSC), u Shivashankarappa S Sahukar, halor ka jingkynnoh ba u la pynsuk ïa ka jingjied be-aiñ ïa ki arngut ki khun kynthei jong u kum ki Industrial Extension Officer. U Lat u la ai jingmut ruh sha ka President ba ïa kane ka kam dei ban rah sha ka Supreme Court katkum ka Article 317(1) jong ka Riti synshar ka ri na ka bynta ban tohkit halor ki jingkynnoh pyrshah ïa u Sahukar. Katba dang ap ïa kiwei pat ki hukum, la bthah ïa u dkhot ba rangbah tam jong ka KPSC ban pyndep ïa ki kam jong u Chairman ban pynthikna ïa ka jingtreikam jong ka Commission. Ha ka hukum, u Lat u la ong ba ka jingpynsangeh ka long kaba donkam ban pynthikna ïa ka “jingtohkit kaba hok, kaba khlem shah liang bad kaba khlem jingktah” bad ban ïada ïa ka jingshaniah jong ka Commission.
