Raphael Warjri
Don kiba biria ba kita ki nongïalam riewsaidaiñ ka HYC ki long ki ba kham tbit ban ïalam ba ka sorkar ka shynraiñ ban kem klumar kumba la ju jia barabor ïa ki dkhot KSU. Ha kata ka khubor ha jylli paidbah shaphang kiba shah set byndi kum ka kyndon ba ki trei hok na ka bynta ka jaitbynriew ka long kaba jngan ban pdiang, namar ka phalang ba tang kiba pynkheiñ aiñ ki dei kiba trei hok. Toi u Bah Robert June Kharjahrin u la khajoh sha ka jylli saiñpyrthei, hynrei kiwei kiwei kiba bud ki dang shitrhem ban ïalam ha ka lynti ban poi sha ka thong kumba la paw ha ki khubor manla ka khep. Ka byrngem byrsit jong ki katto katne na ka seng KSU ka la pyndkoh ïa ka jingthmu ban plie ïa u motdur jong u Bah Bull N Lyngdoh, tat haduh ba ka HYC, shnat Malki ka la sei ki juban ba la dep kubur da ka longïing longsem jong u Bah Bull N Lyngdoh ban ai jingbit na ka bynta ban shna ïa u motdur ba arshah shirynñieng briew ban pynïeng ha Motphran. Kumta ka jingthmu jong ka KSU ban kam trai ïa u nongïalam bad mana pyrshah ïa kiwei, ka la pulom namar ba ki trai kur ki la dep ïa syllok lypa bad ki nongïalam jong ka HYC, shnat Malki. Ha kaba la tuklar ki rangbah na ka longïing longsem jong u Bah Bull N Lyngdoh, ka la mih ka jingïasngewthuh jingmut hapdeng ka KSU bad HYC la kumno kumno ha ka bynta ban pynsahnam ia ka kyrteng jong u samla nongialam bashlur jong ka jaitbynriew. Kata ka dei ka lynti ban pun sha ka ban tehsong skhem triang ïa ki samla ha ka imlang sahlang khamtam ha ka lympung ban ïakhun na ka bynta ka khia ka shon jong ki paidbah.
Lehse ka rngiew jong u Bah Bull N Lyngdoh kan sa lah ban tehsong ïa kine ki artylli ki seng kiba la kham pawkhmat ha kane ka khep mynta haba ïa nujor bad kiwei kiwei. Ha ba phaidien la sngewthuh ba ka iktiar ba ha khlieh jong ka KSU ka la leh bym suitñiew ïa ki dkhot ba shitrhem haduh ban da shah beh seng na kano ma ka daw ba ki paidbah kim peiphang. Wat la kata ka rukom behseng ka dei ka kam ïing jong ka KSU, hynrei ki paidbah ki don ka hok ban tip ïa ka jingshisha kaba lah ban pynksan na baroh arliang, kata ki nongïalam ba beh seng bad ki nongïalam ba shah beh seng. Ka ba mih na kata ka jingïakhing ki nongïalam jong ka KSU ka la pynkha pat ïa ka HYC da kita ki nongïalam kiba shah beh seng bad kiba shah leh kiar bad bym suitñiew da ki para nongïalam. Ym lah ban tip lada ka ingtyrkhong ka dang sah sohkhliang ne la syrpai noh da ka daw ba la shah kylluid mynsiem ban plie paidbah noh ïa u motdur ha ka 31tarik Nailar, 2024. Ki rangbah na ka longïing jong u Bah Bull N Lyngdoh ryngkat bad ka HYC shnat Malki ki dei ki ba la lamkhmat ban wanrah ka jingïasngewthuh jingmut hapdeng ka KSU bad HYC ha kaba plie paidbah noh ia u motdur jong u Bah Bull N Lyngdoh. Khlem artatien ki paidbah kin jyn da la khmihlynti ba ka daw kyllum jong ka jaitbynriew kan syrpai ïa kita ki nongialam na baroh artylli ki seng ba kin tehsong bad ïa treilang na ka bynta ban kit ïa ka khia ka shon jong ka jaitbynriew, ym ban dang kam trai ïa ki kam ba ki trei ki ba dei ban long kyllum ïa ka imlang sahlang.
Ha ka jingshisha ka daw bah kaba ha kliar duh ka dei ban long ba lada lah, dei ban tehsong lang ïa baroh ki sengbhalang ha ka jylla, ba lada dei ban shim nuksa na ki jylla ba marjan ka long kum ka Young Mizo Association ha Mizoram. Ha ba bishar ïa ka jinglong jingman ha ka imlang sahlang, ka paw ba ka long kaba jwat ban khmihlynti kum kata, hynrei la kumno kumno ka dei ban don ka jingsdang ka ba lah ban lam sha kata ka thong. Lehse lada dang don ki diengpyngkiang kiba wit na ka bynta ban tehsong, ki nongïalam na kita ki seng hi ki dei ban weng mardor. Lada dei ba jlan ka por ban syrpai, kawei pat ka lynti ka long ban don noh da ka synjuk ka ban kdup lang ïa baroh ki seng bhalang khlem da shah ïa kano kano ruh ban leh sawkuna da ka ba pynïeng reng tang marwei. Lah ban sngewthuh ba kum ka KSU ka ba la prat lynti naduh basdang ha kaba shakri ïa ki paidbah bad ia ka imlang sahlang, ka long kaba eh ban pyndem bad ban synrop lang ha kane ka khep ba la mih byllai kyrhai ki sengbhalang. Kiwei kiwei ki sengbhalang ruh ki la don la u synñiang u bynhei ïa ka imlang sahlang ha la ki jylli treikam lajong. Don ki ba rit don kiba pdeng bad don ki ba heh ba ym lah ban wanlam ka pansara ba biang na ka bynta ka imlang sahlang salonsar. Khlem da kheiñ dewthala ïa kiwei kiwei ki sengbhalang kiba la trei shitrhem ha la ki jylli treikam, ym lah ban len ba ha kane ka khep mynta dei ka KSU bad HYC kiba la rasong thikna ha ka kam shakri paidbah. Kumta kine ki artylli ki seng ki dei ban pyni ka nongmuna ba kiwei kiwei ruh kin burom bad ka jingpyrshang ban tehsong baroh ki samla kan long ka nuksa babha ha khmat ka pyrthei.
Ki paidbynriew ha jylla kin ïai kyrmen ba yn kut noh ka ba pharia ïa ka imlang sahlang la ha ki shnong ki thaw ne ha ka jylla baroh kawei da ki paradoh parasnam kiba ïashun markynti. Kaba tehsong ka dei ban long naduh mihngi na Khanduli Sahsniang shaduh sepngi ha Nongjri Nonghyllam, naduh na shatei shilynter ka thaiñ Khanapara Langpih shaduh shathie shilynter ka thaiñ Dawki Shella, ka ban kdup shityllup ka Bri Hynñiewtrep.
