Raphael Warjri
Kumta u Weiñ u la tmang haduh katta katta ban duh noh ïa la u hynmen bad u la shang ramia ïa ka khlaw ka btap, da kaba kiar raimaw raidieng na ka imlang sahlang, lait noh na la ka kmie lajong. U Weiñ um kwah shuh ban leit sah bad ka kmie ha Dewsaw namar ba um lah shah ban kynmaw ramia ïa la ka kupar u hynmen bad u la shongneh ha la shnong Nongtrai weibriew. Ki don ruh ki khana ba u la phah teh phah khum ha ki khar Bangla da ki jyrmi ki ba jwat, bad u la bthat suk pat hadien da ka bor radbah jong u. U Weiñ u la leh khnang kumta ban pynher syrngiew ïa ki dkhar Bangla kiba ju mar-mlien ban shukor da ki kam shalak ïa ki paidbynriew Khasi ha them Ri War. Ki don byllai ki khana ba kumno u pynsyier mynsiem ïa ki dkhar Bangla na ka daw ba ki long kiba buitpoh bad arsap. Ynda u la sngewthuh ba la jan dkut u saihukum u la lum la lang la ka spah ka hajar kaba kynthup ruh shikatdei ka ksiar bad u la thep ha ka synduk maw ka ba u la khang tala da u shabi ba tang ma u hi u tip kumno ban plie. Kata ka synduk maw u Weiñ ka dei ka madiah maw kaba ïar daiñ-ly-daiñ la kat kawei ka shnong rit bad ka dang sah shrah kumta haduh mynta mynne. Kita ki thliew shabi ruh ki dang paw shynna ba la ïathuh ba u Weiñ u la ïa tang ba ym bit ban pyrshang plie da lei lei ruh, hynrei te kiba saitlah kin ngat ha ka apot ka ban lam sha ka jingïap bad ka lah ban kylla raibi. Kumta naduh kata ka por haduh mynta mynne ym ju don ki ba shlan ban mushlia ïa kata ka synduh maw u Weiñ.
Ka shem lanot ka dei kawei na ki phang pdeng jong ki khanatang puriskam Khasi bad kine baroh lai ngut shipara ki radbah U Ramhah, u Bnang bad u Weiñ ki don la ka khana shempap kaba sngewmyllung ban ïathuh ha ki longdien mandien pateng-la-pateng. Haba sngap ïa ka khana ym lah shuh ban dang pyrkhat ba ki dei ki puriskam, la sngew hi kumba ki dei ki briew shisha kiba im ba iaid hangne ha sla pyrthei, wat lada ki don ki bynta ba ym lah shuh ban dang pdiang ha kane ka juk mynta. Kata baroh ka ju jia ha man la ka juk jong kino kino ki paidbynriew na ki khana jong ki longshwa manshwa. Ki khana shisha kiba dang tang shipateng arpateng ryta ruh ki don kiba don ïa ka jingshem kiba la sngew kum ki puriskam ba ym sngew lah ngeit ba ka dei shisha. Kum kita ki khana ki ba kham don kum kita ki bynta ba don ka snap puriskam dei kum ki khana ba ngat puri. Haba sngap ïa ki khana jong uta u Dormi na Mawsynram ba ki don ki riewtymmen kiba la ïakynduh shisha bad mad ïa ki kam phylla, ym lah ban ong ba ym lah ban ngeit. Kumjuh ïa ki khana uta u Barli uba dei u nongtuh ba tbit uba lah ban pynjah syrwet ïa lade haba u tuh. Nangta ïa u Loi ruh u ba dei u nongtuh ba tbit u ba la shang kylleng ki Ri dkhar da ki kam tuh jong u, ba ym ju ioh pat ban kem ne lap sabut ïa kita ki kam tuh.
Ka jingmut ka ba dei ban puson sani ka long kumno ban bteng ïa kita ki khana katkujm ba la ïathuh da ki riew tymmen kiba la ïa tyngkhuh bad kita ki briew. La I kmierad jongnga I dang ïathuh ba la ï kynduh markhmat ïa u Dormi ba u sah ha krem bad ba u ju don ha tyngkong krem na ka bynta ban sumar briew ïa kiba ioh ksuid bad ngat puri. Ka daw ka long ba u la phet noh na la ka ïingkmie ban leit sah bad ka tnga puri sha thliew krem, hynrei nangta ruh u la shah beh noh namar ba la thut bad thynrei kata ka puri naduh ba shah beh ïa lade bad ki khun ha ka kiawkurim lajong, kata ka mut ka kmie jong u Dormi. Na kata ka daw u la hap ban ryngkang par na baroh arliang bad ban hun tang ban sah hangta ha tyngkong krem. Haba sngap ïa ki khana ki paw shynna ba ka dei shisha ba don kum uta u briew uba la im ha kane ka sla pyrthei ha kawei ka sien. Ha ka khep ba u Dormi u la pynkohnguh ïa la ka tnga puri ban leit kai kha sha pyrthei ha la ïing kmie, lehse u iohi ïa la ka tnga bad la ki khun kum ki jynthaw ki ba long briew kum ïalade. Hynrei ynda ki la poi shisha sha pyrthei ki la paw ha ka khmat jong ka kmie u Dormi kum ki bseiñ, bad dei na kata ka daw ba ka kmie u Dormi ka la phrieh met shirynñieng ban shem ba kita ki khun kha bad ka pyrsa kurim dei da ki bseiñ.
Kata ka long ba ka pyrthei ki bynriew bad ka pyrthei ki ksuid ki khrei ne ki dken ki puriblei ka long khongpong ba ym lah ban ïadei ha kano kano ruh ka rukom, bad dei tang uta uba mad ha la ka jingim uba lah ban sngewthuh ïa ka jingshisha. Kum kaei kata ka jingshem ym lah ban batai ha kane ka khep mynta ba kumta la sngew tang kum ka ramïa puriskam. Hynrei kita ki riewtymmen ba ïathuh ki khlem shukor ne thaw ñia bad ka dei ka jingshisha tangba kata ka jingshisha ba ki ïa shem ka long kaei kaei kaba ym lah ban peiphang ha kane ka juk mynta.
