Da lei lei ym lah ban len ba ki khun u kpa trai Khasi ki bit janai ïa u kpa ba ai symbai. Lada u kpa u long bha briew ki khun ruh ki long bha briew. Lada u kpa u lyng-kot ka rynïeng ki khun ki bit lyngkot ka rynïeng. ïa kane phin lap la jah man la ki rympei ïing. Ki khun barobor ki bit ïa ka longrynïeng jong u kpa ba ai ïa u symbai ym ïa ka kmie ba pun ba kha. Haba phai ha ki kpa kiwei ki jaitbynriew ruh kum u kpa dkhar, kpa phareng bad kpa Negro bad kiwei kiwei ruh ki khun jong ka kmie Khasi ki bit janai ïa u kpa ba ai ia u symbai. Lada u kpa u dei u Negro ki khun janai ki bit ïa u kpa Negro uba ïong ka sniehdoh.
Lada u kpa u dei u phareng dohlieh ki khun ki bit lieh snieh doh ïa u kpa phareng. Lada u kpa u dei khar Madras ki khun ki bit janai ïa u kpa Madras na ka dur ka dar. Namar ha ka rukom hiar pateng jongngi ki briew ka dei da u symbai ba bet. Kumjuh lada ngi bat ïa u symbai riewmadan ki mih hi u riewmadan. Lada ngi bet ïa u symbai motor un mih hi u motor bad kumjuh kiwei kiwei ki jait symbai ruh. Kane ka long ka jingshisha ba ngi wan longdoh longsnam na u symbai. Kumta kane ka dustur jongngi ki Khasi ka pyniap da lade ïa lade ka long namar ba ngim ñiewkor bad burom ïa ka jingai u Blei u nongpynlong ïa kiei kiei baroh ba ïa u symbai u sohpet u ksai ka longdoh longsnam, longjait longkur kaba la kyrkhu kyrpang da u Blei. Ka rukom ai jait shim jait ha ngi ki Khasi ym dei ban sngew ksan ïa ka jingshisha. Namar kane ka la ïuhroit bad pynduh pyndam ïa u symbai ka hok long trai jong u shynrang Khasi.
Te kaba tang jait kam dei ba ki pynpaw bad pynphriang sha ka pyrthei ba u shynrang Khasi u long u bym don symbai. Kane ka long kaba bakla ban ym ithuh Khasi ïa kiba shim jait na u kpa haba u kpa u dei u Khasi ba nylla. Kane ka dustur jongngi ka ithuh Khasi pynban ïa ki khun jong ki kpa bym dei Khasi. Ka jaitbynriew ka bym pdiang ïa u symbai kan sa jah rngai na ki por ban sa wan. Nga thoh ïa kane namar nga sheptieng ioh ka jah noh u symbai ba nylla ka jaitbynriew Khasi khara na kane ka sla pyrthei.
C. B. Iawphniaw
