Itanagar, Nailur:
U Myntri ka sorkar kmie u Kiren Rijiju u la pynpaw da kaba ong ba ka jingwan dro ïa ki jingbuh dak ha ki jaka bym pat buh pud ha Arunachal Pradesh kam mut ba ki jaka ki la shah pynngat hapoh ka jingkhmih jong ki shipai China’s People’s Liberation Army (PLA). Kane ka jingpynshisha ka long ha ka por ba la ïohlum jingtip shaphang ka jingdon jong ki jingwan hiar thma jong ki shipai PLA ha kane ka jylla.
U Rijiju, uba dei u nongshong shnong jong ka Arunachal Pradesh, u la ong ruh ba ka jingïatyngkhuh jong ka jingpahara jong ki shipai India bad China ka ju jia shisha ha ki jaka ba khlem buh pud ha shilynter ka khappud ka China bad ka India hynrei kata kam wanrah pat ïa ka jingwan buhai shnong ha ki jaka kiba hap hapoh ka ri India.
Kane ka jingkren jong u Myntri ka la long hapdeng ki por ba don ki khubor ba la kynnoh ba ki PLA ki la rung shapoh ki jaka jong ka India ha Anjaw distrik jong ka Arunachal Pradesh ha ka taïew ba la dep bad ki la shong ha ka ktem kaba don ha ka thaiñ Kapapu jong ka distrik da kumba katto katne por.
Ïa ki dur jong ki ding ba meh, ka jingdro ïa ki maw bad ki jait jingbam jong ki nong China la lap ha katei ka jaka ha kaba la pynphriang ha ki Social Media, ong ki khubor.
“Ka China kam lah ban shim ïa ka jaka jong ngi. Ka jingdkoh treikam ka ju don ha ka por ba pynlong ïa ki jingpahara ha kaba ka ju jia ha ki jaka bym don pud. Kim shah ban shna ïa kaei kaei kaba neh. Ka don ka jingpeitngor kaba pyrkhing na ka liang jong ngi. Tang ban dro dur bad ki jingbuh dak ha ki jaka bym don pud kam mut ba ki jaka ki la shah knieh,” la ong u Rijiju ha ki lad phah khubor.
