Guwahati, Naiwieng:
U Myntri Rangbah ka Assam u Himanta Biswa Sarma ha ka 18 tarik u Naiwieng u la ong ba 38 ngut ki briew kiba la shah suba ba ki wan rung beaiñ la kem ha ka por ba pynlong ïa ka jingkhynra shwa ban mih ka sngi katba la kynnoh ba ki pyrshang ban rung beaiñ hapoh ka jylla hapoh ka jingtap jong ka jingdum.
Ha ka jingthoh jong u Sarma, u la ong ba la kem ïa kitei ki briew ha ka por mynstep bad la sdang ïa ki kam katkum ka aiñ kiba donkam pyrshah ïa ki.
U Myntri Rangbah ka jylla u la ong ba ka nongrim jong ka sorkar jylla ka dang neh pyrshah ïa kino kino kiba shah kynnoh ba ki rung beaiñ sha Assam, da kaba kdew ïa ka jingsngewkhia halor ka jingbun briew jong ka jylla, ka ktien, ka kolshor, ka pateng bad ka jingshngaiñ ka ri.
U la bynrap ruh ba ki jingtreikam jong ka sorkar pyrshah ïa kiba suba ba ki wan rung beaiñ kin dang ïai bteng, da kaba pynskhem ba kan ym don kano kano ka jingïapynbeit halor ka jinglong kyrpang, ka burom bad ka jingshngaiñ jong ka Assam.
U Myntri Rangbah um shym la pynpaw ïa ka jinglong jong kito kiba shah kem ne batai bniah ïa ka jaka ba la pynlong ïa ka jingtreikam ha ka kam jong u.
Ki jingtip ba bniah shaphang ki jaitbynriew jong ki bad ka jingshah pynngat ha ka aiñ haduh ba la thoh ïa ka khubor ym pat lah ban tip tikna.