Pynjlan shuh shuh ka sorkar Manipur ban pynsangeh treikam ïa ka Internet

Guwahati, Nailur:

Ka sorkar Manipur, ka la nang pynjlan shuh shuh sa kumba san sngi ha kaba ïadei bad ka jingpynsangeh treikam ïa ka Internet bad Mobile data ha ki san tylli ki distrik jong ka jylla.

Ha ka hukum ba la pynmih ha ka sngi U Blei, ka sorkar Manipur ka la ong ba hadien ba la bishar bniah ïa ka jinglong jingman ha ka jylla ha kaba ïadei bad ki jingpyntreikam ïa ki aiñ, ka la rai ban nang  bteng shuh shuh ïa ka jingpynsangeh treikam ïa ka Internet bad Mobile Data sa san sngi kaba sdang naduh ka 15 tarik u Nailur.

Ka hukum ka la ong, “Ka sorkar jylla hadien ba ka la khmih bad bishar bniah ïa ka jinglong jingman halor ki aiñ bad ka jingpyntreikam kaba long ha baroh ki liang ha ki ar taiew ba la dep, ka la rai ban bteng ïa ka jingpynsangeh treikam ïa ka Internet bad Mobile Data.”

Ka hukum ka la ong ba ka jingpynjlan ïa ka jingpynsangeh shipor ïa ka jingpyntreikam ïa ka Internet bad ka Mobile Data kan treikam ha ki jaka ba hap hapoh ka Imphal West, Imphal East, Thoubal, Bishnupur bad Kakching distrik.

“Ka jingpynsangeh treikam ka kynthup ruh ïa ki VSAT bad ki VPN ha ka Territorial Jurisdiction jong ka Imphal, West, Imphal East, Thoubal, Bishnupur bad Kakching district jong ka Jylla Manipur sa 5 sngi kaba la sdang naduh ka 15 tarik, Nailur.”

Ka la ong ba ka jingpynsangeh treikam ïa ka Internet kan neh ha kine ki district haduh ka por 3 baje janmiet jong ka 20, tarik, Nailur.