Guwahati, Naiwieng:
U Myntri Rangbah jong ka Assam u Himanta Biswa Sarma, u la pynpaw ïa ka jingkyrshan ïa ka Jenny, kaba la tip ruh kum ka Indira Dewri, kaba dei ka nongshong shnong jong ka Assam, kaba la pynthymmai ïa ka jingdawa jong ka ïa ka hok, ha ka jingïakajia kaba la neh mynta la 23 snem, ha kaba la donkti bad u Myntri barim ka Uttarakhand, u Harak Singh Rawat, uba dei u nongïalam ka seng Congress.
Ha ka jingthoh ha ka social media ha ka 11 tarik u Naiwieng, u Sarma u la ong ba u la ïakynduh ïa ka Jenny ha ka 10 tarik u Naiwieng bad u la pynrem ïa ka jingshah lehbeiñ kaba la kynnoh ba ka la mad.
“Hynnin ka sngi, nga la ïakynduh ïa ka Jeni, kaba dei ka nongshong shnong jong ka Assam. Kaei kaba u briew uba kyrteng u Harak Singh Rawat na Uttarakhand, u la leh ïa ka, ka long kaba bakla haduh katta katta bad kaba dei ban pynrem. Ka jingshah lehbeiñ jong ka, kam dei satia ban jia ïano ïano ruh. Nga ïeng skhem ha ka liang jong ka, ha ka jingïakhun jong ka, na ka bynta ka hok,” la thoh u Sarma.
Dang shen ka Jenny ka la wanphai biang sha Dehradun, ha kaba ka la pynthymmai ïa ka jingdawa jong ka ban pynlong ïa ka jingtohkit bathymmai jong ka Central Bureau of Investigation (CBI) bad sa kawei pat ka DNA test ban pynshisha ïa ka jinglong kpa jong u khun jong ka uba dang 23 snem ka rta.
Haba ai jingkren ha ka jingïalang bad ki nongthoh khubor ha Uttaranchal Press Club, ka la kyrpad ïa u Pushkar Singh Dhami, Myntri Rangbah ka Uttarakhand, na ka bynta ban ïoh ïa ka hok bad ka la ong ba kan sah beit ha Dehradun, haduh ban da pynbeit ïa ki jingdawa jong ka.
Ka la buh jingkylli ïa ka jingtohkit kaba kham hashwa, da kaba kynnoh ba ka CBI kam shym la buh jingthoh bha ïa ka Account jong ka bad ba ym shym la shim nongmuna na u khun jong ka ban leh ïa ka DNA test. Ka la pan ruh ïa ka Narco test bad jingiada, da kaba kynnoh ba ka la ioh ia ki jingbyrngem.
Katba u Rawat, u la kyntait ïa kitei ki jingkynnoh, kynthup ïa ka jingshah kynnoh batbor bad u la tuklar ïa kito kiba donkti ban leh ïa ka DNA test hapoh ka jingpeit jong ka ïingbishar.
Kane ka jingïakynad ka la sdang naduh u snem 2003, ha kaba la kynnoh pyrshah ïa u Rawat. Ïa kane ka kam la bishar bniah da ka jingtohkit jong ka ïingdorbar jylla bad hadien kata la tohkit da ka CBI. La ïathuh ba ka test DNA, kaba la leh ha ka por ba tohkit, kam shym la lap ïa ka jingïadei hapdeng u Rawat bad katei ka khynnah, hadien kata la ai ïa u, ïa ka rai sait khuid.
Mynta ka Jenny ka la wad ïa ka jingtohkit bathymmai bad ban leh biang ïa ka DNA test, katba u Rawat, u la pynksan biang ïa ka jingkyntait jong u bad kynnoh ba ka BJP, ka la pynim biang ïa ka jingïakynad, ban thmu ïa ka Congress.
Ka jingpynpaw paidbah jong u Sarma ïa ka jingkyrshan ka la wanrah ïa ka jingpyrkhat thymmai ïa katei ka mukotduma, kaba la mih biang hadien palat arphew snem.
