Guwahati, Naiwieng:
Ki petrol pump ha kylleng ka Assam ki la khang haduh 24 kynta naduh ka por 6 baje mynstep jong ka 12 tarik u Naiwieng namar ki nongdie umphniang ki la pynlong ïa ka jingïakhih ‘bym thied, ym die’ ha ka jylla baroh kawei pyrshah ïa ka jingkynnoh ba la pyndik bad leh be-aiñ da ki kompeni die umphniang (OMCs).
Kane ka jingkhang khyrdep kaba la khot da ka North East India Petroleum Dealers’ Association (NEIPDA) kan bteng haduh ka por 6 baje mynstep jong ka 13 tarik, Naiwieng.
Kane ka seng ka la maham ruh ban khang khyrdep khlem buh por naduh ka 23 tarik, Naiwieng lada ki jingud jingnam jong ka ki dang sah khlem pynbeit.
Ki nongdie umphniang ki la kynnoh ïa ki OMC, kynthup ïa ka Indian Oil Corporation, ba ki shim ïa ki rukom treikam kiba heh kti, ki byrngem ban pynthut ïa ka jingpynpoi umphniang bad ki shim ïa ki rai kiba leh mon khlem da bud ïa ki kyndon aiñ ne ailad ïa ki nongdie ban pynpaw ïa ka liang jong ki.
Napdeng ki jingujor ba kongsan ba la pynpaw da ka seng ki long ki jingbyrngem ban pynsangeh noh ïa ka jingpynpoi umphniang bad diesel namar ka jingkynnoh ba la pynkheiñ aiñ, ka jingpynsangeh ïa ki jingpynbeit jong ka jingïatreilang jong ki kali tank khlem da pyntip lypa, bad ka jingpynbor ïa ki nongdie ban thied ïa ki mar ba kham bun, khamtam eh ïa ki umphniang.
Ka NEIPDA ka la kynnoh shuh shuh ba la khanglad ïa ki jaka thep umphniang bad ki nongdie ki la shah pynbor ban buh ïa ki mashin point-of-sale watla ki don ka jingsngewkhia halor ka jingsiew kaba dang sah teng bad ka jingduhnong ha ka liang ka pisa tyngka.
Ka seng ka la kynnoh ruh ba ki kompeni umphniang ki pynduh marwei na ki SAP Account jong ki nongdie bad pynslem ban siew biang ïa ki Subsidy ba la mynjur bad ki jingsiew ba la leh ban pynbiang ïa ki jingdonkam jong ka Legal Metrology Department requirements.
U General Secretary ka NEIPDA u Arup Goswami u la kynnoh ba ki kompeni die umphniang ki leh palat ïa ka bor jong ki bad ki pyndik ïa ki nongdie umphniang khlem da ailad ïa ki ban batai ïa ka nongrim jong ki.
U la pynpaw ruh ïa ka jingsngewkhia halor ka jingkynnoh ba la die jubor ïa ki mar ba ki nongthied kim shym la thied, da kaba kynnoh ba kum kine ki mar ki dang sahkut ha ki jaka die marbam, ki shim jaka bad ki wanrah ïa ka jingduhnong kaba khraw ha ka liang ka pisa tyngka.
Ka seng ka la dawa ban pynphai biang ïa ki jingïateh ba la pyndam, ban weng noh ïa ki jingpynkylla ba la ïaleh pyrshah, ban siew biang ïa ki bai lutksan kiba dang sahteng bad ban pynkut noh ïa ka jingkynnoh ba la die jubor ïa ki umphniang.
Ka NEIPDA ka la maham ba lada ym lah ban pynbeit ïa ki jingeh, ka lah ban wanrah ïa ka jingkhang khlem kut por naduh ka 23 tarik u Naiwieng, kaba lah ban pynthut ïa ka jingpynpoi umphniang ha kylleng ka Assam.
