Chandigarh, Nailur:
Da ka jingweng kyrteng noh u kyrtong jong ka u Rohtash Jangra na Sirsa ha ka lah sngi U Blei, ka seng BJP ka lah ban ai jingkyrshan noh ïa u heh jong ka seng Haryana Lokhit Party (HLP) u Gopal Kanda ha ka ilekshon Assembly.
Kumba long ka seng Congress, ka seng BJP mynta kan sa ïakhun da 89 tylli na ki 90 tylli ki konstitwensi. Hashwa kane, ka seng BJP ka la khot ïa ka jingïalang kaba kyrkieh ha Sirsa bad ka la rai ba u Jangra u dei ban hiar shuki noh. U Kanda uba dei u MLA na Sirsa, la ai jingkyrshan kham mynshwa ïa ka sorkar BJP. “Nga la weng noh ïa ka jingthep kyrteng jong nga. Ïa ka rai la shim na ka bynta ka jingmyntoi jong ka jylla bad ka ri, ngi hap ban pynthikna ïa ka kynhun ka seng Congress ha Haryana,” la ong u Jangra.
Haba la buh jingkylli hato u la weng noh na ka jingkwah u Kanda, une u nongïalam ka BJP u la ong, “U Gopal Kanda u la kyrshan ïa ngi (BJP) la san snem. Ngi la shim ïa kane ka rai na ka bynta ka jingroi jong ka Sirsa.” Haba pynkynmaw ïa ka jingïadei kaba la slem jong ka longïing jong u bad ka seng RSS, u Kanda u la ïathuh ba u kpa jong u, u Murli Dhar Kanda, u la ïakhun na Dabwali konstitwensi ha u snem 1952 da ka tiket na ka Jan Sangh, bad ka kmie jong u ka dang ïai bteng ban long ka nongkyrshan jong ka seng BJP.
