Bengaluru, Naiwieng:
U president ka BJP ha Karnataka u BY Vijayendra u la ong ba ka jingjop jong ki kyrtong ka NDA ha baroh saw tylli ki konstitwensi jong ka Legislative Council ka pyni ba ki sngi kiba bha ki dang ap ïa ka seng bad u la ong ba ka NDA kan sa thaw ïa ka sorkar ha kane ka jylla hadien ka elekshon sha ka ïing dorbar thawaiñ jong u snem 2028.
Ha ka jingkren sha ki nongthoh khubor ha ka jingïalang ‘Save Democracy, Eradicate Anarchy’ ha Mysuru ha ka sngi Balang jong ka taïew ba la lah, u Vijayendra u la ai khublei ïa ki nongthep vote kiba la pyndep ïa ka jingpule bad ki nonghikai kiba la kyrshan ïa ka jingïatreilang jong ka BJP-JDS bad ai khublei ruh ïa ki kyrtong kiba la jop.
U la ong ba ka jingmih ka la pynmih ïa ki katto katne ki jingbatai saiñ pyrthei, da kaba kynnoh ba ka sorkar Congress ka don hapoh ka jingpynbyrngia ba la thaw da ki skhim ai jingkular jong ka bad ka la shah pynbuaid ha ka bor synshar.
U la kynnoh ba ka sorkar jylla kam shym la lah ban weng ïa ki jingeh jong ki nongrep, ban ai jingïarap na ka jingkyrduh bad ban thaw kam thaw jam.
U Vijayendra u la kynthoh ïa u nongïalam ka liang pyrshah ha Lok Sabha u Rahul Gandhi ba u pyrshang ban wanrah ïa ka jingbymsuk ha ka ri namar ka jingangnud jong u ban long Myntri Rangbahduh.
Haba kdew ba la pynlong ïa ka elekshon da kaba pyndonkam da ki kot thep vote, u la ong ba ka Congress ka la rem wat hapdeng ka rukom thep vote kaba ka la kyrshan, da kaba kynnoh ba ka seng ka duna ka jingshaniah ha ki jaka thep vote.
“Ka jingmih ka dei ban poi sha u Myntri Rangbah ka jylla, u Symbud Myntri Rangbah ka jylla bad u Rahul Gandhi. Ka NDA khlem pep kan sa thaw sorkar ha Karnataka ha ka sien ban wan.Ym don ki bor kiba sniew kiba lah ban khanglad ïa kane”, u la ong.
