New Delhi, Risaw:
Ka kynhun INDIA Bloc, ka la pynsangeh noh ïa ka jingïalang lyngba ka video kaba ka la thmu ban ïakren halor ki sienjam kiba bud ha ka jingïakhih jong ka pyrshah ïa u Chief Election Commissioner u Gyanesh Kumar.
Katkum ki tyllong khubor, la buh por ïa ka jingïalang ha ka janmiet jong ka sngi Palei ban thaw ïa ka buit ban pynlong ïa ki jingïakhih halor ka jingkynnoh “vote chori” bad ban ïakren ïa ki lad ki lynti ban pynjur ïa ka jingdawa ban phah iehkam noh ïa u Chief Commissioner u Gyanesh Kumar.
U President ka Congress u Mallikarjun Kharge u dei ban long u nongïalam jong kane ka jingïalang, ha kaba yn bishar bniah ruh ïa ka jingpynkhreh na ka bynta ka jingïalang jong ka INDIA bloc ha Delhi ha ka 1tarik Naiwieng, ki la ong.
Ki nongïalam jong ka INDIA bloc ki dei ban ïamir jingmut ban shna ïa ka lynti jong ki jingïakhih, ban bishar bniah ïa ki jingpynkhreh na ka bynta ka jingïalang paidbah ha ka 1 tarik u Naiwieng bad ban ïakren ïa ki lad ki lynti ban pynkhih ïa ka sorkar halor ka mat ‘vote chori’ shen ha ka jingïalang.
Ym shym la don kano kano ka jingpyntip shaphang ka jingïalang kaba hadien jong ka kynhun.
Ka jingïalang ka long ruh kaba kongsan namar ba ka wan ha ka por ba la jur bha ka jingkynnoh ba ka sorkar kan khot ïa ka Parliament ban mynjur ïa ka aiñ pynkylla ïa ka Riti Synshar halor ka jingpynbeit pud, shwa ban pyntreikam ïa ka Women’s Reservation Act.
Ha ka taiew ba la dep, ki jingïakhih halor ka jingshah kynnoh “tuh vote” ki la poi haduh ka jingkhang jong ka Supreme Court.
Ha ka 12 tarik u Risaw, ki nongïalam pyrshah, ryngkat bad ki nongïakhih bad ki dkhot jong ki sengbhalang, ki la ïashim bynta ha ka “March for Democracy” ha ka lynti kaba la khang pyrshah bha bad ki la ujor ïa ka dorkhas ba ïatreilang pyrshah ïa ka jingpyntreikam ïa ka Special Intensive Revision (SIR) ïa ki thup nongthep vote, da kaba kynnoh ba ka jingbun paid jong ki nongthep vote ka pyni ïa ka jingbym ïahap jong ki nongthep vote.
U Rahul Gandhi u nongïalam ka Congress u la pdiang sngewbha ruh ïa ki nongïalam jong ka INDIA bloc ban ïadih sha ha ïing jong u ha ka 13 tarik u Risw.
Hadien ka jingïalang, ka kynhun pyrshah ka la kular ban bteng ban pyrshah bad ban rah ïa ka jingïaleh “vote chori” sha ka jingkut kaba thikna.
