Chennai, Naiwieng:
Ki kmie ki kpa kiba don hajan Bhavani ha Erode District ki la bteng ïa ka jingïakhih jong ki, da kaba kyntait ban phah ïa ki khun sha ki skul rit bad skul heh jong ka Local Panchayat Union, kum ka jingpynrem ïa ka jingpyntuid ïa ki jaboh jabaiñ na ki karkhana ki bym shym la pynkhuid sha ka wah kaba don hajan. Halor kane, u District Collector u la pynlong ïa ka jingïakren bad ki kmie ki kpa ha ka taïew ba la lah.
Katkum ki tyllong khubor, la ong ba ha ka shnong Poonatchi hajan ka Bhavani, ka jaka pynmih shimet kaba pynmih ïa u powder ba la tylliat na u phan dieng bad u riewhadem bad ka jingpynmih ad ka jaka pynmih bioethanol kaba don marjan, ki dang treikam. Ki nongshong shnong ki la kynnoh ba kawei ka wah, kaba la tip kum ka Sittraru, kaba tuid lyngba ki shnong ba marjan bad shapoh ka wah Cauvery, ka la kylla jakhlia namar ki jaboh jabaiñ ki bym pat pynkhuid kiba la mih na ki Unit.
Ki don ki dam talasi ha ki san tylli ki jaka sha shiliang kata ka wah. La kynnoh ruh ba ki jaka ba don ki Check Dam khamtam ka shnong Nathamedu ki mad ïa ka jingshah pynjulor kaba jur bha ha ka mariang namar ka jingtuid ki jaboh jabaiñ.
Ha kane ka jingjia, ki kmie ki kpa ha kane ka thaiñ ki la kyntait ban phah skul ïa ki khun bad ki dawa ban khang noh shi syndon ïa baroh ar tylli ki karkhana kiba la kynnoh ba ki dei kiba donkti ha ka jingjaboh bad ban shimkhia mardor ban pynbha pat ïa ka mariang kaba la shah ktah.
Namar ba kane ka jingeh ka la neh mynta la lai taïew, u District Collector u S Kandasamy u la pynlong ïa ka jingïakren bad ki kmie ki kpa ha ka taïew ba la lah. Ha kane ka sngi la ïadonlang u E Maanvizhi uba long u CEO ka Erode bad kiwei pat.
Haba ïakren bad ka lad phah khubor, u Kandasamy u la ong, “Hadien ki jingujor, la pynlong ïa ki jingjurip ha ka jaka shna Starch bad kata ka jaka ka la dep ban khang noh. Ki kmie ki kpa ruh ki la ujor halor ka karkhana bioethanol. Ngim lah ban shim khia da kaba pynshong nongrim tang ha ki jingujor. Kumta, ngi dang pynlong ïa ki jingtohkit ha ka sngi. Shuh shuh, la ïathuh ba ngi la batai shai ïa ki jingtip baroh bad la ai jingmut ïa ki kmie ki kpa ban phah biang ïa ki khun sha skul. Ki da mynjur ruh ïa kane.”
“Ki don 15 ngut ki khynnah skul kiba pule ha ki skul rit bad 140 ngut ha ki skul pdeng. Ki kmie ki kpa ki la don bynta ha kane ka jingïakhih ha kine ki 23 sngi ba la dep. Hynrei, naduh ka taïew ba la dep, ki khynnah ki la sdang ban wanphai biang suki suki sha skul. Ha ka sngi Balang jong ka taïew ba la lah, ka la don ka jingwan jong ki 10 ngut ki khynnah skul ha katei ka skul rit bad 70 ngut ha ka tnad pule puthi jong ka skul pdeng.
