Shillong, Nailur 18
Ka lympung ïalehkai Second bad Third Division Football League 2024 ba la pynïaid da ka Tyrsad Area Sports Association (TASA) ka la nangjam shaphrang ha kaba ka Nongwah SC bad ka Mawpon SC ki la khur jingjop ha ka sngi Ba-ar.
Ha ka jingïakhun jong ka Second Division kaba la long ha madan Tyrsad, ka Nongwah ka la pynliem noh ïa ka Phudbyrnei SC da 3-1 kol. Ïa kine la thep da u Pynskhembor Nongbet ha ka minit kaba 39 bad ïa ki ar kol la thep da u Armishal Khasain (45 & 52). Hynrei ka Phudbyrnei ka la lah ban pynphai kylla shi kol lyngba u Shestarwell Jyrwa (69).
Ha kawei pat ka jingïakhun jong kane kajuh ka kyrdan ïalehkai hapdeng ka Mawliehpoh SC bad ka Nongmadan SC ki la ïasam mar shi point hadien ba kim shym la lah ban thep kol haduh ba kut ka jingïalehkai.
Haba phai sha ka Third Division, ka Mawpon SC ka la pynliem noh ïa ka Madan Ïewskiat SC da 2-0 kol. Ïa kine la thep da u Sonbistar Khasaiñ ha ka minit kaba 20 bad u Shambor L. Nonglait (55).
