Nongpoh, Nailur:
U Symbud Myntri Rangbah ka jylla, Bah Sniawbhalang Dhar ha ka Lah Sngi U Blei u la leit ban jurip ïa ka Kad Liengsuiñ ha Umroi na ka bynta ban khmih bniah halor ka jingthmu ban pynheh ïa kane ka Kad ban pynsuk ïa ka leit ka wan jong ki paidbah ka jylla bad ruh ban long kum kawei na ki lad ïoh kam-ïoh jam ïa ki khun samla.
Ha kane ka sngi la wan ban ïadon ryngkat da u Chief Secretary ka jylla, Bah DP Wahlang, u MLA ka Umroi konstitwensi, Bah Damanbait Lamare, u Deputy Commissioner ka Ri Bhoi, u Abhilash Baranwal, ki ophisar na ka tnat Transport ka jylla, na ka tnat Civil Aviation ka Sorkar Pdeng, ki bor ba dei khmih jong ka Kad Liengsuiñ ha Umroi lem bad kiwei kiwei.
Haba kren sha ki lad pathai khubor hadien ka jingïalang bad jurip ïa ka Kad Liengsuiñ, u Bah Sniawbhalang Dhar u la ong ba ka sorkar jylla ka la shimkhia bha ha kaba ïadei ba kane ka jingpynheh ïa ka Kad Liengsuiñ ha Umroi bad ïathuh ba ka kaiphod kaba la dep ban leh nyngkong kam long satia kaba biang bad mynta la leh biang da kawei pat kaba thymmai, bad ba ka don ka lad ban pynheh shuh-shuh ïa kane ka Kad Liengsuiñ na ka bynta ban wanrah ïa ki liengsuiñ kiba heh kum ka A320 bad A321.
U Bah Sniawbhalang u la pyntip ruh ba ki don khyndiat ki bynta kiba ka Sorkar Jylla ka hap ban kyrpad sha ka tnat Civil Aviation ka Sorkar Pdeng na ka bynta ban weng lane pyllait ïa katto-katne ki kyndon (guidelines) khnang ba yn lah ban pynurlong ïa kane ka jingthmu ban pynheh ïa katei ka Kad Liengsuiñ kaba dei ruh ka jingangnud jong ka Sorkar Jylla, ym tang ban pynsuk ïa ka leit ka wan jong ki paidbah, hynrei kan ïarap ruh ban wanrah ïa ka lad ïoh kam-ïoh jam.
U la ong ruh ba lada ka Sorkar Pdeng kam lah ban pdiang ïa kitei ki jingkyrpad jong ka Sorkar Jylla, kan shem jingeh pat namar ka jinglut ka la long kaba palat liam, da kaba kdew ruh la kumno-kumno kan lut haduh T.8,000 klur na ka bynta ban pynheh ïa kane ka Kad Liengsuiñ katkum ki kyndon ba la buh da ka tnat Civil Aviation ka Sorkar Pdeng.
U la pyntip ruh ba halor ka jingthmu pynheh ïa kane ka Kad Liengsuiñ, ka Sorkar Jylla ka hap ban thied biang sa kumba 16 akar ka jaka (extra additional land) bad kumba 6 akar ïa ka jaka pynïeng ïa ki liengsuiñ lane ka parking bay. U la ïathuh ba ïa kane ka bynta yn sa rah pat ha ka jingïalang ka Kynhun Myntri ka ban sa long ha ka Sngi Balang khnang ban pynsted bad pynïaid shakhmat ïa kane ka kam.
Haba pyrshang ban wad jingtip halor ka jinglut jingsep kaba ïadei bad ka jingpynheh ïa kane ka Kad Liengsuiñ, u Bah Sniawbhalang u la ïathuh ba ka Airports Authority of India (AAI) kan hap ban pynlut kumba T.500 klur eiei tam ne duna, katba ha kaba ïadei bad ka jingthied ïa ki jaka pat, yn leh hi da ka Sorkar Jylla.
Shuh shuh u Symbud Myntri Rangbah u la ïathuh ruh kumba long mynta, ki don palat 8 tylli ki liengsuiñ kiba hiar ha kane ka Kad Liengsuiñ man la ka sngi ban kit ïa ki paidbah nongleit nongwan kum sha ka nongbah Kolkata, New Delhi bad kiwei kiwei ki jylla ka thaiñ shatei lam-mihngi. Namar kata, u kyrmen skhem ba lada ka jingpynheh ïa kane ka Kad Liengsuiñ kan ïaid beit ïaid ryntih kumba la angnud da ka Sorkar Jylla bad kan lah ban treikam miet la bad sngi (24×7), yn sa pynbha bad pynitynnad shuh-shuh ïa ka kumba long lem kiwei de ki Kad Liengsuiñ jong ki jylla ha ka ri.
