Shillong, Jylliew 16
Ka Tunisia ka la weng noh ïa u coach u Sabri Lamouchi hadien ba kane ka kynhun ka la mad ïa ka jingshah rem kaba nyngkong ha ka World Cup 2026.
Kane ka kynhun ka la shah rem haduh 5-1 kol ha ka Sweden ha ka jingïalehkai jong ka Group-F ha ka step jong ka lah sngi U Blei ha Estadio Monterrey kaba ha Guadalupe, Mexico.
Ki khubor ki ïathuh ba tang hadien ba ka la shah rem, ki bor ba dei khmih ki la weng noh mardor ïa u Lamouchi, hynrei la ong ba une u coach ba la 54 snem ka rta u la ai jinghikai ïa ka kynhun ha ka lah sngi U Blei.
Hynrei na ka liang ka Tunisian Football Association mynta ka la pynthikna ba ïa ka kontrak jong utei u coach uba na France la pynkut noh da ka jingïasngwthuh jingmut lang.
La ïathuh ba u Manager barim jong ka Morocco bad Saudi Arabia, u Herve Renard, u la shah thung kum u coach ba thymmai jong kane ka kynhun haduh ban da kut kane ka lympung.
Kane ka jingshah weng u Lamouchi ka dei ka sien kaba nyngkong eh ha ka World Cup tang hadien ba la kut ka jingïalehkai kaba nyngkong.
Lah ban kdew kane ka sien kaba ar ba ka Tunisia ka la weng ïa u manager jong ka u Henryk Kasperczak hadien ka jinglah ban ïalehkai bha ha ka jingïalehkai kaba nyngkong ha ka World Cup jong u snem 1998, ha kaba katei ka kynhun kam shym la lah ban khur jingjop ïa kawei na ki ar tylli ki jingïalehkai ba nyng-kong jong ka.
“Kane ka jingshah rem ka la long ka jingpangnud kaba khraw,” la pynpaw u Lamouchi hadien ka jingshah rem ha ka Sweden.
“Ban sdang ïa ka jingïakhun da kane ka jingshah rem ka long shisha kaba eh. Ngi la bakla bun bad kane ka long kaba ngim sngew lah ban pdiang ,” u la bynrap.
Hapoh ka jingïalam u Lamouchi, ka Tunisia ka la jop kawei na ki san tylli ki jingïalehkai paralok kata da ka jingjop ïa ka Haiti da 1-0 kol ha ka jingshimti nyngkong.
Ka Tunisia kan pynkhreh ïa ki jing-ïakhun ba dangsan jong ka Group-F pyrshah ïa ka Japan bad ka Netherlands.
