Bratislava, Jylliew:
U Myntri Rangbahduh ka ri India, ha ka Sngi Nyngkong u la ioh pdiang ïa ka khusnam ba khraw tam duh jong ka ri Slovakia, ka ‘Order of the White Souble Cross’ (First Class).
Kane ka long ka sien ba 33 ba u Modi u la ioh pdiang ïa ka khusnam jong ki ri ka pyrthei.
U President ka Slovakia u Peter Pellegrini u la ai ïa kane ka khusnam ha u PM Modi ha ka jingialang ha Bratislava.
“Nga sngew burom ban pdiang ïa ka The Order of the White Double Cross (1st Class) ha Bratislava mynta ka janmiet. Ka jingsngewnguh jong nga ïa ki paidbah bad ka Sorkar Slovakia na ka bynta kane ka burom, kaba dei jong ki 140 klur ngut ki paidbah jong ka Ri India. Nga aiti ïa kane ka khusnam sha ka jingiadei paralok kaba neh hapdeng ka India bad ka Slovakia,” la ong u PM Mo.
U PM Modi u la khot ïa kane ka khusnam kum ka jingpynshisha ïa ka jingsngewtynnat, ka jingshaniah, bad ka jingieit kaba pyniatylli ïa ki paidbah ka India bad Slovakia, bad kyrmen ba kane ka khusnam kan ai mynsiem ïa ki pateng ban wan ha baroh ar tylli ki ri ban bteng ban pynroi ïa ka jingiadei paralok ba kyrpang jong ki, la ong ka tnad kam bar ri ha ka kyrwoh.
Ka Order of the White Double Cross (1st Class) ka dei ka jingpynkup burom kaba ha khlieh duh jong ki riew paidbah bad ki shipai ba la ai kyrpang da ka Slovakia tang sha ki nongshong shnong bar ri.
U PM Modi, u don ha Bratislava, kum shi bynta jong ka jingleit jngoh jong u kaba shi taiew sha Europe. Ka dei ka jingleit jngoh kaba nyngkong eh jong u myntri rangbahduh jong ka ri India sha ka ri Europe.
Shwa kane, ka India bad ka Slovakia ki la kyntiew ïa ka jingïadei jong ki sha ka jingïatreilang kaba pura bad ki la pynskhem ïa ki 11 tylli ki jingïateh ban pyniar ïa ka jingïatreilang hapdeng ki arliang mamla ha ki bynta bapher bapher kum ka jingwan buhai shnong, ka teknoloji digital bad ka jingïada ri.
