Beirut, Nailur:
Ka Hamas ha ka Sngi Nyngkong ka la pyntip ba u nongialam jong ka u la khlad noh hapdeng ka jingleit thombor jong ka Israel sha Lebanon ha katei ka sngi sha ka phang Shatei jong ka Lebanon.
U Fatah Sharif Abu al-Amine, u long u nongialam jong ka Hamas na Lebanon bad ruh u dkhot jong ka kynhun ki nongialam ka Hamas, uba iadon bynta ban pynïaid bad pyniar ia ki kam ka kynhun sha kylleng ki ri. Hynrei, la ong ba utei u nongialam u la khlad noh hapdeng ka jingleit ther bom jong ka Israel sha ka jaka sah jong u hapoh Al-Bass jong ka phang Shathie ha Lebanon.
Nalor kata, la ong ba utei u nong-ialam u la khlad noh bad ka kurim ryngkat 2 ngut ki khun jong u, kiba kynthup ia uwei u khun shynrang bad kawei ka khun kynthei.
Ka tnat pathai khubor jong ka Lebanon ha katei ka sngi ruh ka la pynbna ba katei ka jingleit thombor jong ka Israel sha katei ka thaiñ, ka long ka sien ba nyngkong eh ia ka Lebanon ban sakhi khamtam ia ka jingshah thombor ha katei ka jaka treikam jong ka kynhun ha Al-Bass.
Namar la ong ba ka Israel ka la leit thombor na ka por- sha ka por sha Lebanon, ban ioh pynkhyllem ia ki nongialam ka Hamas kiba don ha katei ka ri bad kiba ioh jingkyrshan bad ioh jaka rieh ruh na kitei ki para ri lehnoh kiba don marjan bad ka Palestine.
Ha u Nailar ba la leit, ka Israel ka la leit thombor ia kawei ka kali sha ka phang Shatei hi jong ka nongbah Sidon jong ka Lebanon, ha kaba uwei u heh nongialam ka Hamas- u Samer al-Hajj u la khlad ha katei ka jingjia ha katei ka por.
