U Nongsaiñ Hima,1969
Kawei na ki kam ba la shimti shen ka Sorkar, hapoh ka Ri ka long ka jingpynïaid da lade ïa ki khadsaw tylli ki bank. Ka jingthmu ba kongsan jong kane ka long ba ka Sorkar ka kwah ban plie lad ïa ki rit ki ria khamtam ïa ki nongrep ban ioh bai seng kaba biang ban kyntiew ïa ka rep ka riang. Ha kane ka rukom kine ki bank kin lah ban plie ïa ki shnat jong ki ha ki jaka kyndong ba ki nongrep kin lah ban leit ban wan bad ïadei kam bad kine ki bank, ha ka rukom kaba suk bad ryntih. Ym tang ba ki nongrep kin lah ban shim kylliang kum kine ki bank ha ka sut kaba jem, hynrei kin lah ruh ban kynshew katba ki don ka bor.
Hynrei ka jingkylli ka mih ba wat kane ka jingthmu ka long ka ba bha shibun kaba la ioh ïa ka jingïaroh na baroh kawei ka Ri, ki don ki jingeh kiba la ju pynpulom ïa ka jingïaleh ban pynroi pynsan, tang la i dei bad ki kam pisa. Ban shu kdew khyndiat, yn nym ïakaren ïa ki bank, hynrei ïa ki loan bad grant da ka pisa ba ai ka Sorkar ki la man um lut, katba ngi lah ban iohi khamtam ha kine ki ri – lum jong ngi. Katno shuh kan long kaba mynsaw lada ki bank kin nang pynjan shuh shuh ïa ka pisa sha ki nongrep, kiba lehse bun na ki, kin pyndonkam bakla ïa kane ka kabu. Lah ban ong ruh ba dei na kane ka daw ba ki ophis Block ha bun ki bynta jong ka Ri, hangne ha Ri Khasi ne ha kiwei kiwei ki jaka, kim shym la lah ban wanrah ia kano kano ka jingbha ne jingroi bad ki la shu pynbuaid pisa pynban da ki loan bad ki grant ïa u luk u lak.
Ngim ong hangne ba ka jingshimti ka Sorkar ïa ki bank ka long kaei kaei kaba sniew ne babha, hynrei namar ba ka Sorkar ka don mynta ka bor ban pynïaid ïa kine ki bank bad ka jingïadei bad jingïarap ia ki nongrep, ka dei ruh ban khmih ba ki briew kin nym shim kabu ban pyndonkam bakla ïa kane ka lad kumba jia baroh shi katta. Ki tnat jong kine ki bank Sorkar ki ban ïadei kam bad ki nongrep, ha ka jaka ka pisa, ki dei ban ai ram ïa ki nongrep da ki jingdonkam kum ka sboh dawai, ki masi lur lane tractor, ki symbai jingthung bad kiwei kiwei. Ki nongrep pat ki dei ban siew noh ïa ka ram bad ka sut da ka jingmih na khyndew ne da ki jingri. Lada ki bank sorkar kin treikam ha kane ka rukom, ka jingthmu jong ka jingshimti ïa ki bank da ka sorkar, khlem pep kan wanrah ïa ka jingroi jong ka spah ka phew bad ka ioh ka duh ha ki briew shimet bad ruh ïa ka Ri baroh kawei.
Ka khyndew jong kine ki lum, khamtam hangne ha Ri Khasi, ka long kaba iadei bha ban pynmih ïa ki diengsoh diengpai, hynrei ym pat don koit ka jingpyrshang ban kyntiew ïa kane ka rep soh, ne pynim pat ïa ka hadien ka jingtroin jong ki per bad bri soh ba ïar jong ka Ri War . Ka Ri War ka lah ban pynmih ki soh niamtra, ki lum pat ïa ki soh phoh, soh plom, ka Bhoi pat ïa ki soh trun bad kiwei kiwei, bad lada la pynshlur bad pynmih ha ka rukom kaba dei, kane ka thaiñ kan jin da long shisha ka ri u soh u sai.
Mynta hadien ka jingplie ïa ki su rok bah kiba ïalam sha kylleng ki kyndong jong ka Ri, kan nym don jingeh ba lah ban kit ïa ki soh na kawei ka jaka sha kawei pat ne sha ki ïew ki hat ha ka por kaba biang. Ym tang ba yn lah ban shalan ïa kine ki soh, hynrei bun bun ki samla kin lah ban ioh ïa ki kam ki jam, lada don ki karkhana ha man ki dong ki ban pynmih ïa ki sumsoh ha ki bilor, ki tin bad kiwei kiwei de ki jingbam na ki soh kum ka jam bad kiwei kiwei. Na kine ki soh lah ruh ban shet ïa ki jingdih kiba thew ban tei ïa ka met ka phad jong u briew, kumba long ka wain ha ki ri Europe bad ba beer ha ka Ri Germany. Kane kan pynduna shibun ïa ka jingpyndonkam bakla ïa u khaw u krai bad kumta kan nym don ka jingkyrduh ha ka liang jong ka bam ka dih.
Kine ki lum kiba don ka khyndew kaba sboh bad ka lyer u slap kaba biang, ka la dei ban sdang ïa kaban pynshong nongrim ïa ka ioh ka kot halor ka rep ka riang bad ki jingthung jingtep, kaba lada leh kan pynlong khlem pep ïa kane ka jaka kaba pahuh pahai, bad ïa ka jingmih kaba tam ruh lah ban shalan sha kiwei kiwei pat ki Jylla ne ki jaka ba marjan.Ka rep ka riang kumba ka long mynta ka long u bud – lum jong ka spah jong ka Ri.
