Kumba la thoh ha ka Baibl.UJisu katkum ka Gospel u long u khun ba la kha ha ka Mari bad u Joseph. Ka Mari ka la kha ïa u khun uba nyngkong jong ka bad ka la sop ïa u da ki jaiñsop bad ka la pynthiah ha ka shyngoid (Lukas 2 : 7). Hynrei ka rukom hikai niam bad ngeit niam la ñiew kum u khun u Blei. Ka jingkha ïa u Jisu Khrist te ka long kumne, haba ka kmie jong u ka Mari ka la ïatehktien bad u Joseph mynba kam pat ïa shem la paw ba ka la punkhun keiñ na uta u Mynsiem Bakhuid. U Mynsiem Bakhuid ha ka jingshisha u dei u Blei. Hato don mo kano kano ka kynthei briew kaba punkhun khlem da ïa shongkha bad u briew. Wat ka Mari ka kmie jong u ka la lyngngoh kumno kane kan long, naba kam pat ithuh ïa u briew te naba la kha ïa u Jisu ha Bethlehem Judia mynba u Herod u long u Syiem ha kata ka por ba kha ïa u Jisu, te la wan ki riewstad na Mihngi sha Jeruslem ki la kylli hangno uta uba dang kha shen u Syiem ki Jiw ? ki riewstad u la ïathuh bad u la ong me long u Khrist u khun u Blei ba im (Math 16 : 16). Katba u Apostol Paul ha ka shithi sha u Timothi u ong, namar don uwei u Blei bad uwei u ksiang ruh hapdeng u Blei bad ki briew, U KHRIST JISU UBA U HI RUH U BRIEW (I – Tim 2 : 5). Katba uwei u briew uba kyrteng u Kleophas ula ïathuh shaphang u Jisu uba na Nasareth uba long u Nongïathuhlypa uba khraw bor ha ka jingleh bad ha ka ktien ha khmat U Blei bad u paidlang baroh (Loukas 24 : 19). Katkum ka Gospel u Blei u long u Mynsiem kumta ban tip ba u dei u Blei, ngi dei ban sngewthuh shai ba u Blei u bym ju ïap, u bym lah ïohi uba u Blei tang ma u hi uba khraw bor tam eh ïa baroh.
Kane ka long ka jingshisha ba u Jisu u long u nongïathuhlypa uba khraw bor eh ïa baroh. U dei u Blei kumno mo ki rangbah Lyngdoh ki ïoh ban pyrthuh beiñ lem bad ki nongthoh bad ki tymmenbasan ki la ïa ong, u la pynim ïa kiwei ïalade pleng um lah ban pynim (Math 27 : 41). Kumno keiñ ïa u Blei la tep kum ïa ngi ki briew ha u Lum jingtep kaba la tih ha u mawsiang bad haba la pyntyllun ïa u maw ba khraw ha ka jingkhang ka jingtep (Math 28 : 60). Kumno keiñ u long u Blei u lah ban jied ïa ki khatar ngut ki synran jong u. U la thung de ïa ki khatar ngut ba kin ïoh long lem bad u ba un ïoh phah ïa ki ban ïalap (Markos 3 : 14) bad kumno keiñ ki shipai ki la shoh ruh ïa ka khlieh jong u da u prew bad ki la bynthiew ïa u (Markos 15 : 19). Kumno u Judas u lah ban die tad ïa u Jisu lada dei u Blei, namar u Blei u ithuh ïa kata ka jaka haba bunsien u Jisu u la ju leit ïaseng hangta lem bad ki synran jong u (Ioannis 18 : 12).Kumno keiñ ki ïohi ïa u Blei haba ïa u Blei ym lah ban ïohi ? Kumta men ym ong thala ïa ka kyrteng U Trai uba U Blei jong me haba U Trai un ym pynksan ïa uba ong thala ïa ka kyrteng jong u (Deut 5 : 11). Ka ktien u Blei ka long kaba im bad kaba donbor balei ngin thok ngin shukor haba ngi phla ïa u Blei, phla ïa ka jingshisha kumba ka ktien u Blei ka ïathuh bad ym dei ban pyntam ne pynduna khyndiat ruh. Kine baroh ki long ki jingshisha ba ka Baibl ka ïathuh kumta.
C. B. Iawphniaw
