Ka ilekshon sha ka ïingdorbar thawaiñ ha Haryana kan leit sha ka histori jong ka ilekshon jong ka ri India kum kawei na ki jingbym lah ban mutdur. Kane ka pynshisha sa shisien ïa ka dak ba ka Congress ka la nang bha ïa ka buit ban rem da ka burom ïa ka ilekshon kaba la jan jop. Ha Haryana, ha kaba la sngewthuh ba ka Congress kan sa ïoh ïa ka jingjop hynrei ka la khyllem noh khram pynban. Ka Bharatiya Janata Party (BJP), ha kaba ym shym la don ki ‘Exit Poll’ ki ban ïathuh lypa ba kan ïoh wat ka jingjop kaba rit hynrei ka la ïoh pynban da ka jingjop baheh. Kane ka pyni ba ha ka ri kaba ïar kum ka India, ka jingkheiñ ban ai jop lypa ha ka ilekshon ka donkam ïa ka jingpynbeit kaba khraw ïa ka lynti.
Ka Haryana ka long ka nuksa kaba paka tam ïa ka BJP hapoh ka jingsynshar jong u Myntri Rangbahduh ka ri u Narendra Modi bad u Amit Shah kum u Myntri Kam Pohïing jong ka Sorkar India. Wat la ka BJP naduh kaba sdang ka la don ha ka jingartatien hynrei ka jingïaishah bad ka mynsiem ïaleh jong ka BJP ka la wanrah ïa u soh ka jingjop.
Katkum ka risol jong ka ilekshon MLA sha ïingdorbar thawaiñ ka Haryana kaba la pynbna ha ka Sngi Ba-ar, la sakhi ba ka ktem jong ka seng Congress ka la shongshit bad lehkmen da kaba pynbthei ruh ïa ki ‘bom pataka’ kum ka dak ka jinglehkmen hadien ba ki la tam shakhmat bad sngewthikna ban jop beit. Pynban kane ka jingleh kmen bad risa ka la neh tang katto-katne por bad jah noh jlang, naba tang hadien shi kynta tam eiei, ka BJP ka la kiew stet bad stet ban tam syndon ïa u laiñ jong ka jingïoh synshar (majority mark) kaba la pynkyndit bad pynshaïong ngaiñ ym tang ïa ka Congress hynrei wat ïa kiba bun ki lad pathai khubor kiba la dep ban ai rai lypa lyngba kita ki ‘Exit Poll’ ba ka jingjop ha kane ka kynti kan dei jong ka Congress ka ban sa thaw syndon ïa ka Sorkar ba thymmai ha Haryana.
Haba phai sha ka risol jong ka ilekshon MLA ba dang shu dep ha Haryana, ka Congress marwei ka la jop 31 katba ka BJP ruh marwei ka la jop haduh 40 ngut ki MLA. Ha ka jingshisha ha kane ka kynti kaba mynta, ka BJP ka la hap ban ïakhun tyngeh bad kam shym la poi pyrkhat ruh ba kan lah ban leh bha kumne, hadien ba ka la dep ban synshar haduh ar sien kynthih ha Haryana bad ha kaba bun kiei kiei ki la mih, ki jingshah kynthoh pyrshah bad ka jingïaphet seng hapdeng ki dkhot. Ka jingshah rem ka Congress ha kum kane ka kynti ba ka la don ïa ka kabu, ka pyni ba kam lah shuh ban dang synshar ne ban pyndon ïa kata ka jingieit ha ki mynsiem jong u paidbah, uba la kyntait biang war sa shisien.
Ym tang ha Haryana, ka Congress kam shym la lah ruh ban khie-khlieh ha ka ilekshon ha Jammu & Kashmir bad ka la jop tang 6 ngut MLA. Hynrei ka shu ksaw noh ba ka la ïatreilang bad ka National Conference kaba la ïalam da u Farooq Abdullah, kaba la ïoh ka jingshaniah na u paidbah ban ïalam ïa ka Sorkar ba thymmai. Katkum ki jingpaw, ka daw jong ka jingshah rem ka Congress, ka long ba kum ki Nongïalam bahakhmat jong ka, kim shym la trei shitom ban rung sha ki paidbah ban pynsngewthuh bad katkum ka jinglong jingman shwa ka ilekshon, ki Congress ha Haryana ki la don lypa ha kata ka jingsngewlah lypa (overconfidence mood) kaba la dei ka dawbah jong ka jingkhyllem biang sa shisien.
Ka jingjop jong ka BJP ha Haryana bad ka jinglah ban leh bha ha Jammu and Kashmir, ka pynpaw ruh ba ki skhim bapher bapher ba la wanrah da ka Sorkar Pdeng, kaba la ïalamkhmat da ka BJP ki la treikam shisha bad kiba la ai jingmyntoi ïa ki nongshong shnong.
Ka ilekshon MLA ha Haryana ka la dei kaba san hadien ka Punjab, Uttarakhand, Madhya Pradesh bad Chhattisgarh ba ka Congress ka la dei ban jop hynrei ka khlem jop. Kumta kum ki Nongïalam kin hap ban wad ïa ki daw tynrai bad wanrah ki jingbujli kiba donkam bad ïa kane tang ka por kan sa batai.
