Ka jingpynlong jong ki pulit ïa ka jingkhynra bad talasi kaba kyndit ha ka miet jong ka sngi Saitjaiñ ban tehlakam ïa ka jingpynkheiñ aiñ da ki nongñiah kiba ñiah thurmur ïa ki kali ne ki arshaka ha ki surok bad buh jingma ïa kiwei ka long kaba biang bad kaba dei ban ai ka jingïaroh. Ngi ïohi ba ha ka por miet, ka jingñiah kali ka long shisha kaba thurmur bad pynher haduh ba ka buh jingma ïa kiwei pat. Ha ka por miet, ki nongñiah kali imat kim ju don shuh ka jingsalia ne ka jingtieng hynrei ki la kylla long kumta kita kiba ngi ju ong ha ka ktien nongwei “King of the Road” naba ki ñiah pynher bad pynïeng kali kat haba ki sngewbit bad sngew mon bad kim don satia kata ka jingpyrkhat ïa kiwei pat kiba bud nadien.
Ngi shem ruh ba ka jingñiah kali hapdeng ka jingshoh u khawiang ruh ka jur bha ha ka por miet naba ki sngewthuh ba ha ka por miet ym don shuh ki ban peit ne ban bat ïa ki. Kane ka jingsngew ka jong ki, kaba buh jingma pat ïa ka jingim jong kiwei kiba hap ban mih ha ka por miet ban leit donkam ïa la ki kam kiba kyrkieh ne kito kiba leit phai ïing na ki kam ki jam ki jong ki.
Hooid ka jingïaroh dei ban ai sha ki pulit halor kum kine ki jingkhynra, hynrei kum kine ki jingkhynra kim dei pat ban long eh tang shisien lano eh hynrei ban bteng bad pynlong manla ka por khnang ba kan pynlong lypa ïa kito ki nongñiah kali ha ka por miet ba kin hap ban pyrkhat bunsien shwa ba kin mih sha surok.
Ngi ïohi ba ka jingkhynra bad talasi kali ha ka miet sngi Saitjaiñ la pynleit jingmut bha ha kaban pyrkhing ïa kito kiba ñiah kali hapdeng ka jingshoh khawiang, ka jingshna ne modify ïa ki kali bad ïa ki jingpyndiat ïa ki jingthaba ne lights, ka jingtah ïit ïong ki kali ha ryngkat bad ka jingkhmih bniah ïa ki kot ki sla bad ïa kiwei pat ki jingpynkheiñ ïa ki kyndon jong ka Motor Vehicles Act.
Ban tehlakam bad pyrkhing ïa kito kiba ñiah kali hapdeng ka jingshoh khawiang, ka tnad pulit ka dei ban khynra bad ban ïakhun pynduhjait ïa ka jingshyrkhei jong ka jingdie kyiad beaiñ ha ka por miet ha ka thaiñ Polo, Demseiñiong Urkaliar. Lah ban ïohi ba ha ka por miet, ka jingïeng jong ki kali, ki arshaka ha kine ki bynta ka la pynwit shi katdei eh ïa kiba leit ba wan, don lei kiba ïeng khlem jingsalia wat lada ki ïohi ba ka la khapngiah lypa hynrei ki ïeng beit. Balei ka tnad pulit kam lah ban leh eiei ïa kane ka bynta. Dei na kane, ba ka jingbun kiba ñiah kali hapdeng ka jingshoh khawiang ka jur bha namar watla khang ki dukan die kyiad, hynrei kam long kaba eh pat ban mih na ïing ha ka por mynmiet ban leit thied namar ïoh beit.
Ka tnad pulit ka dei ban shimkhia mardor ïa kane bad ban leh eiei pyrshah namar katba ym pat lah ban pynkhuid ïa ka ktem, ka jingmih ki kam sniew, ki kam pynkheiñ kyndon aiñ da ki nongñiah kali, yn nym lah ban pynduh. Khamtam lei kum ha kane ka juk kaba mynta, kaba la synshar da ka jingsngew sarong ha u bynriew, ka la eh shibun ban ïakren ne kyrpad haba don ka jingpynwit hynrei hap ban shu sngap bad ap haduh ba kin da pyllait lynti. Tang pynmih kyntien lei ban kyrpad, tang katta la khluid uba shah kyrpad. Kum ki para briew, ngi dei ban don ka jingburom lem iwei ïa iwei, haba ngi kwah ïeng ne thied jingthied, ngi dei ruh ban pyrkhat ïa kiwei ym tang ba la biang ïalade ngin klet noh ïa kiwei.
