Agartala, Risaw:
U Myntri Rangbah jong ka Tripura, u Manik Saha, u la kynnoh ba ki seng ka liang pyrshah ki la ïasuhbuit sniew pyrshah ïa ka sorkar da kaba ïalam bad pynsngewthuh bakla ïa ki paidbah. Kane ka jingong jong u Myntri Rangbah, ka la mih hadien shisngi ba ka seng CPI(M) ka la pynlong ïa ka jingïalang bad ka jingïaid paidbah kaba dang shen da ka Congress, kaba dawa ïa ka jingïarap bad jingkyrshan na ka bynta ki lanot kiba la shah ktah ha ka jingshlei um bad halor ka jingshah ktah ka jinglong jingman.
Ha kajuh ka por, ka seng BJP ruh kaba bat ïa ka jingsynshar ka la mih paidbah ha ka 4 tarik, Risaw ban pyrshah ïa ka jingïakhih jong ki seng ka liang pyrshah. Da ki hajar ngut ki nongkyrshan ki la mih sha surok ha ka nongbah.
U Saha, uba la ïashim bynta ha katei ka jingïalang, u la kynnoh ba ki seng ka liang pyrshah ki thaw ïa ka buit pyrshah ïa ka sorkar da kaba ïalam bakla ïa ki paidbah.”Ki kren thok halor ka jingtreikam jong ka sorkar. Nga kwah ban buh jingmaham ïa ki seng ka liang pyrshah bad kyrpad ïa ki ba kin kiar na kaba kynnoh khlem nongrim pyrshah ïa ka sorkar ba la ïalam da ka BJP namar ba ka treikam da kaba shai bad ba paw paidbah,” u la ong.
Da kaba kam ba ka BJP ka la jop ilekshon kawei hadien kawei pat, u la ong ba ka mut ki paidbah ki don bad ka sorkar, kaba trei na ka bynta ka bha ka miat jong ki paidbah.
