Bengaluru, Risaw:
U ADGP M u Chandra Sekhar, uba dei u heh nongïalam jong ka kynhun SIT kaba tohkit ïa ki kam tih dewïong beaiñ, ha kine ki khyndiat sngi ba la leit u la buh da ka jingujor sha ki pulit pyrshah ïa u Myntri ka sorkar kmie uba dei khmih ïa ka tnat Steel and Heavy Industries u H D Kumaraswamy bad u khun jong u u Nikhil Kumaraswamy halor ka jingkynnoh ba ki la byrngem ïa u ban pynthut ïa ka jingtohkit pyrshah ïa u Myntri Rangbah barim.
Ka jingtohkit ka dei halor ki jingkynnoh ba u la pdiang be-aiñ ïa ka jingaiwai tih marpoh khyndew ha ka par kaba heh 550 akar sha ka Sri Sai Venkateswara Minerals ha Bellary distrik da kaba pynkheiñ ïa ka aiñ ha ka por ba u la long Myntri Rangbah jong ka Karnataka naduh u snem 2006 haduh u snem 2008.
“Ka Kynhun SIT, hadien ba ka la pynkhreh ïa ka kaiphot halor ka jingtohkit bad hadien ba ka la lap ïa ki sakhi bad ki tiar kiba biang ban pynngat ha ka aiñ ïa uba shah kynnoh, ka la thoh sha u Lat ka jylla Karnataka ban pan jingpynshitom ban pynngat ha ki kyndon ïa uba shah kynnoh… ha ka 21, Naiwieng, 2023,” la ong u Sekhar ha ka jingujor jong u kaba u la mudui ha ka jaka treikam jong ki pulit ka Sanjay Nagar.
U Lat ka jylla u Thaawarchand Gehlot, ha ka shithi jong u kaba u la thoh ha ka 29 tarik, Naitung, 2024, ka la dawa ïa ki katto katne ki jingpynshai hadien ba u la ïaid lyngba ïa ka kaiphot, u la ïathuh.
Kane ha ryngkat bad kiwei kiwei ki kot ki sla ki la poi sha ka kynhun SIT hadien 11 sngi ha ka 8 tarik u Nailar. Ïa ka jingpynshai ba la pan la phah ha ka 19 tarik, Nailar bad u Lat u la pynphai biang ïa ka File ha ka 29 tarik, Nailar, la ong u ADGP. “Ka kyhun SIT ka sah sa tang shi sienjam na ka bynta ban ïoh ban pynngat ha ka aiñ pyrshah ïa une uba la shah kynnoh u Kumaraswamy”, la ong u Sekhar.
