Ranchi, Risaw:
Ka seng Jharkhand Mukti Morcha (JMM) kaba bat ïa ka jingsynshar hynnin ka sngi ka la pynmih ïa ka thup kyrteng kaba nyngkong jong ki 35 ngut ki kyrtong na ka bynta ka ilekshon Assembly ka ban long ha u bnai ban wan, ha kaba ka la buh ïa ki 21 ngut ki MLA kynthup ïa san ngut ki Myntri.
U Myntri Rangbah ka jylla u Hemant Soren bad ka kurim jong u, ka Kalpana Soren, kin ïakhun na Barhait bad Gandey konstitwensi. Kitei ki 5ngut ki Myntri, kiba la shah jied biang, ki kynthup ïa u Basant Soren, uba dei u hynmen jong u Myntri Rangbah ka jylla, na Dumka.
Ka seng JMM ka la pynïakhun ruh ïa u Jagat Majhi bad u Alok Soren, ki khun jong ki dkhot ka Lok Sabha u Joba Majhi bad u Nalin Soren, kiba la long ki MLA shwa ba kin shah jied sha ka Lok Sabha ha Parliament. Kine ki arngut kin ïakhun ïa ka Manoharpur bad Shikaripara konstitewnsi.
Ka seng JMM ka la kyntait ban ai tiket ïa u MLA u Dinesh William Marandi. U Hemlal Murmu un mih ha ka jaka jong u Marandi kum u kyrtong jong ka seng JMM na Littipara. “Ïa ka thup kyrteng jong kiwei pat ki kyrtong kiba dang sah yn sa pynmih shen”, la ong u General Secretary ka JMM u Vinod Pandey.
Ka JMM ka la pynïakhun ruh ïa u MLA barim ka seng Bharatiya Janata Party (BJP) u Kedar Hazra na Jamua bad ïa u MLA barim ka seng AJSU u Umakant Rajak.
Ka jingpynbna jong ka seng ïa ka thup kyrteng ka la long khyndiat kynta hadien ba u nongïalam jong ka seng Rashtriya Janata Dal (RJD) u Tejashwi Yadav u la ong ba ki nongthep vote jong ka Indian National Developmental Inclusive Alliance (INDIA) ki la poi sha ka jingïasngewthuh jingmut halor ka jingïasam ïa ki shuki ha Jharkhand. Ki jingkynthoh ki la mih wat ha ka por ba ki nongthep vote jong ka kynhun ba la ïalam da ka JMM, kaba kynthup ïa ka RJD, ka Congress, bad ka Seng Communist of India (Marxist-Leninist) Liberation lane ka CPI(ML) ki la pynmih ïa ki thup kyrteng jong ki kyrtong jong ki. U Yadav, uba ka seng jong u, ka la jied ïa 6 ngut ki kyrtong, u la pynskhem ba ka kynhun synrop, ka long kaba ïatylli bad ba u Hemant Soren, un long biang u Myntri Rangbah.
Ka ilekshon na ka bynta ka jingjied ïa ki 81 ngut ki dkhot jong ka ïingdorbar ha Jharkhand kan long ha ki ar bynta ha ka 13 bad 20 tarik u Naiwieng bad la khmih lynti ba ka JMM kan ïakhun ha ki 41 tylli ki konstitwensi, ka seng Congress 30 tylli, ka RJD 6 tylli bad ka seng CPI(ML) 4 tylli.
Ha ka sngi Saitjaiñ, u Hemant Soren u la pynbna ba ka seng JMM bad ka Congress kin ïakhun ha ki 70 tylli na ki 81 tylli ki Assembly konstitwensi katba kiba dang sah kata ki 11 tylli kiwei pat yn sa buh na ka bynta ka seng RJD bad ki seng ka kynhun Left. Ka Congress ha ka lah sngi U Blei ka la pynmih ïa ka thup kyrteng jong ki 21 ngut ki kyrtong wat haba ka jingïakren hapdeng ki jingïatreilang ka dang ïaid shakhmat. Ka CPI(ML) ka la pynbna ïa ki kyrteng jong ki lai ngut ki kyrtong. Saw ngut ki kyrtong ka JMM ki la dep thep kyrteng shwa ba ka seng kan pynmih ïa ka thup kyrteng ba nyng-kong jong ki kyrtong.
