D. H. Kharkongor
Une u dei u Risaw, u bnai uba shiphew bad kane ka dei ka taiew kaba khadduh ka jong u. La khmih lynti ba une u bnai un dei ka jingsdang jong ka aiom Synrai. Phewse naduh ka taiew kaba nyngkong bad kumba ar-lai sngi, ka sngi ka buhrieh pynban ïalade, khlem da pyni shuh, wat tang shipor, ïa la ka jong ka durkhmat. Nga kynmaw ba kumba ar-lai sngi ka suiñbneng ka shu long sui-sui kat haduh ba khlem da lah shuh ban iohi kyndiang ïa u mawsiang bneng. Ha nga ka long kaei kaei ka ba phylla, ha kat ka aiom Synrai. Ym lah khlem da kyndit ruh thret ynda haba ther biang u slap. Hadien kyndit bynriew ba ka dei ka jingphaidien biang noh jong ka lyiur. Kaba ha kane ka kynti ka da phai dien pat ruh kham dier ka por.
Te to ka lyiur ka lah kut hynrei sa shisien ngi hap mad biang, sa ha kane ka taiew kaba dang shu dep, ïa ka jinglong sui-sui biang jong ka suiñbneng. Ngi hap ban mad biang ïa u slap, hynrei uba hap jem jai, ha ka jaka jong ka jingshai bad ka jingsyiad jong ka sngi, ka jingkhuid jong ka suiñbneng lem bad ka jingpyngngad. Ngi hap ban duh biang noh ïa ka lyer synrai kaba ju beh hir-hir, khamtam ha ka por janmied. Ngi hap ban mad pynban ïa ka jingkhriat, kaba kum haba sdang ka Tlang. Kine baroh ki dei na ka daw jong ka ‘cyclone’ ba la jer kyrteng ka ‘Dana’, kaba da khyrwit tyngeh ïa ka jylla Odisha.Te kumta ngi la duh leh nohei noh kumba artaiew ïa ka Synrai. La kata ngin ïa kyrmen ba ngin dang ioh pat ïa ka Synrai kaba shisha, ka ban neh la kumno-kumno kumba lai taiew, kata, tad haduh ka taiew kaba ar ka jong u Naiwieng.
Te to ngin ïaphai beit noh sha ka phang bad kata ka dei kane ka jingïai pyrshang ka jong ki MDC jong ka KHADC ba kin kham paw khmat shriew ban ïa ki MLA. Ki dak ka shin ba kin jin da la jah kyrteng na ka saiñpyrthei, lymda dei ba dang pynneh pynsah ïa ki Autonomous District Council (ADC), wat hadien ba ngi la ioh ïa la ka jong ka jylla kaba pura. Kumta ym lah khlem da rymmuiñ ïa kane ka jingbunkam ka jong ki ban ïa kyntiew skong ïa la ka Autonomous District Council (ADC). Ki bapli ki ïa bun kam ha kaba wad ïa ki lad ki lynti da kumno ba kin lah ban pynksan ban ïai pynneh pynsah ïa ki ADC naba lada ym don ADC kin jin da long tang ki riewmadan kum nga kum phi. Ki ïa bun kam ha kaba ïai pyrshang ban pynsngewthuh bakla ba ki ADC ki kham kor bad ki kham don bor ban ïa ka Sorkar jylla. Ki ïa pynthait pynlwait ïa la ka jong ka jabieng, da kaba wad ïa ki ñia ki jutang ba kin sei madan, ban pynthame ïa nga ia phi, ba lymda dei ka jingdon ka jong ki ADC ngi baroh, kum ka jaitbynriew, ngin jin da lah jahrngai, kumba jahrngai ki ‘Dinosaurs’ nangne na sla pyrthei. Ynda haba sngap ïa ki nia ki jutang ki jong ki, kum ki MDC, te sngewmat kumba ki ADC ki dei ka lyer kaba ngi hap ban ïa ring mynsiem ne ba wat ïa kane ka lyer kaba ngi ïa ring mynsiem ruh ngin nym ioh shuh lymda dei ba ngi dang don ïa ki ADC. Ki nia ki jutang kiba kumba ki ADC ki dei ka ‘Ksiar’ katba ka Sorkar jylla ne ka ‘State Legislative Assembly’ ka dei tang ka Tama. Ki nia ki jutang kiba kumba ngim pat ioh, wat haduh mynta, ïa la ka jong ka jylla kaba pura ne ba ngi dang don hapoh jong ka ‘Composite State of Assam’.
Kumta ym lah khlem rymmuiñ, khamtam eh ia ka jingpadiah ka jong ki MDC, kiba dang shen ki dang shu dep ban ia mih madan, kum ki kyrtong, kiba ïa airengtyngeh ban ioh ban long MLA ne dkhot jong ka ïingdorbar thaw aiñ jong ka jylla. Kiba thmu ban iehnoh ïa ka ‘Ksiar’ bad ban leit kynrup pynban ïa ka ‘Tama’. Kiba angnud ne thrang pynban hir-hir ban ioh ban long dkhot jong ka ‘State Legislative Assembly’. Ki bymhun ban long tang ki MDC.
Te lada ka kham kor shisha bad ka kham khrawbor shisha ruh de ka ADC ban ïa ka Sorkar jylla te hato kin ïa angnud hir-hir kumto, haduh katto katto, ban ioh ban long MLA ne dkhot jong ka ‘State Legislative Assembly’ ne ka ïingdorbar thaw aiñ jong ka jylla ? Te hato kin ïathang ïong ruh haduh katto katto ynda, haba ki rem pynban kumto? Hato kin ïa bynñiaw lane kin ïa pangnud ruh de haduh katto katto? Tang na kane ka liang shwa ruh ngi lah dei ban ithuh shai ne sngewthuh shai ïa ka dor kaba shisha ka jong kine ki Autonomous District Council (ADC) ne ki ïew khaiï ‘Trading License’. Ym lah khlem da rymmuiñ.
