Ka jingïabeiñ ïakhoh ïa la ka jaidbynriew lyngba ki rynsan ‘Social Media’ ka la pynhiar dor shi katdei eh ym tang ïa ki nongbeiñ hynrei wat ïa ki nongshah beiñ bad ïa ka jaidbynriew baroh kawei kaba shah beiñ lyngba ka jingpyndonkam da ki kyntien kiba khor bad kiba sngewjli haduh katta-katta ban sngap. Balei hap ban da beiñ da khoh, lada ym mon shuh, ka bha ba kiar bad leh jngai beit, ynnai phai dien ne pyrshang ban wad ïa ki daw hynrei kan bha ban im beit ïa la ka jong ka jingim, naba kam don jingkhang satia ban im laitluid marwei ha la ka jong ka mon, hynrei dei pat ban tyngkan ïa la u thylliej ban beiñ ne kren tohmet ïa kiwei.
Dang ha kine ki sngi, ngi la ïohi ba ka la don ka jingsaphriang jong kawei ka durkhih (video) da kawei ka samla Khasi kaba shong ba sah ha Bangalore, ha kaba khlem jingsalia ne don jingsngew satia, ka la kren tohmet bad ban beiñ ban khoh da kaba pyndonkam da ki kyntien kiba laiphew jait kiba ym sngewlah satia ban sngap pyrshah ïa ki Khasi ha ki rynsan ‘social media’ lyngba ka Instagram. Ha kaba ïadei bad kane ka jingleh jong kane ka samla, ki seng kum ka HITO bad ka KSU Bangalore Unit kiba la pynpaw ba kim lah shuh ban shu sngap halor kane ka jingkren beiñ jong kane ka samla, ki la mih shakhmat ban leit ai syndon da ka jingujor ejahar hakhmat jong ki pulit ba kin shimkhia bad ban kem mardor ïa kane ka samla. Ka jingleh jong kane ka samla da kumne ka la pynhiar dor shi katdei eh ïa ka jinglong-jingman jong u Khasi bad kumta donkam ban shimkhia ban leh da kaba tyngeh khnang ba kum kine kiei-kiei kin nym jia shuh nangne shakhmat bad ruh kan long ka nuksa ïa kiwei pat.
Ka jaidbynriew Khasi kam kut shuh tang hapoh ka jylla hynrei ki la don ha kylleng ki bynta jong ka Ri bad wat shabar jong ka ri ruh kumjuh. Kine ki kynthup ïa ki samla kiba leit ban pyntbit ha ki jingpule, kiba leit trei leit ktah ne kito kiba la shong la sah junom ruh kumjuh. Kumta kum kine kiei-kiei ki jingkren bad beiñ ki pynjah burom shi katdei bad ka pyni ruh sha ka pyrthei ba ka jaidbynriew Khasi imat ka dei ka jaidbynriew ka bym don ka akor ka burom ne kaba kum ki kmie ki kpa kim shym la pyni lynti ne ban sneng ban kraw ïa la ki khun ki kti. Ngi hap ban sumar bad tyngkan ïa la u thylliej haba ngi don hangno-hangno ruh, namar ka shi kyntien kaba mih ruh ka lah ban pynmong bad pynsniew ïano-ïano ruh, kumba ju ong ka kyntien ba u ‘thylliej uba lah ban pynbha bad u thylliej ruh uba lah ban pynmong. Kumta haba kren ngi hap ban tyngkan bha.
Balei ngim lah ban kbum la ka shyntur haba ngim mon ne ngi isih ïano-ïano ruh namar kum ha kane ka khyllipmat, ki kyntien khlemakor ki long beit hakhmat bad mar ïa ang ka shyntur ban kren la lait shwa da kine ki kyntien bad shisien ba la mih ka la eh ban nguid biang. Kane kan dei ruh ka mat ba hakhmat eh na ka bynta jong ki kmie ki kpa khamtam kito kiba phah ïa la ki khun ki kti shabar ka jylla na ka bynta ka jingpule ne kito kiba leit trei leit ktah ba kin da sneng da kraw bha ban kiar na kum kine kiei kiei, namar kum kine kiei-kiei shwa ba kan pynjah burom ïa ka jaidbynriew, nyngkong eh ki ban shah kren bad shah kdew kti kin dei beit ki kmie ki kpa. Kum ha kane ka juk kaba mynta ha kaba ka rynsan ‘social media’ ka la long kaba khlaiñ bha ngi dei ban nang pat pyndonkam ïa ka. Lada nang ban pyndonkam ha ka rukom kaba dei kan long shisha ka jingmyntoi kaba khraw na ka bynta kino-kino ki jingthmu hynrei lada bakla ban pyndonkam kan ym dei tang ka jingsniew ha lade shimet pynban kan ktah ruh syndon ïa baroh lang, namar ban shu pynphriang ha ki rynsan ‘social media’ ïa kino-kino ki jingtip khlem da pynshisha ne ban buh da ki durkhih kaba kren tohmet ne kren sniew ïa kiwei, ki kloi bha ban saphriang sted bad kane kan pynmynsaw shisha.
