Lucknow, Risaw:
Uwei u briew uba la 20 snem ka rta u la shahkem na Noida naba u la byrngem pynïap ïa u khlur ak phlim u Salman Khan bad ïa u Zeeshan Siddiqui, uba dei u MLA bad u khun jong u nongïalam ka seng NCP (jong ka kynhun u Ajit Pawar) u Baba Siddiqui, uba la shah siat ïap ha ka 12 tarik, Risaw.
Ki pulit jong ka Mumbai ki la rah ïa une u briew uba la shahkem ba la tip kyrteng kum u Mohammed Tayyab na ka bynta ka jingtohkit bad pynsted ïa ki jingpyntreikam ban ïohlad ban pan jingbit ha ka ban set bad tohkit ïa u.
Katkum ka jingïathuh ka tyllong khubor kaba la wan na ki pulit, la ong ba ka jaka treikam jong u Zeeshan Siddiqui kaba don ha Bandra ka la ïohpdiang ïa ki Message ha ka janmiet jong ka Sngi Thohdieng, kiba la byrngem pynïap ïa u Salman Khan bad ïa u MLA lada kim siew ïa ka pisa ba la dawa na ki.
Ki nongtrei kiba don ha ka shlem treikam jong u Zeeshan Siddiqui ki la leit mudui sha ki pulit bad ujor da ka ejahar. Hadien ba la leh ïa kaba donkam, ki pulit da ka jingtrei shitom ki la ithuh ïa une u runar bad la tikna ba u la donkti ha ka ban phah ïa ki khubor byrngem-byrsit bad kem syndon ïa u.
