Chandigarh, Risaw:
U Myntri ka tnat ki kam Pohïing jong ka sorkar pdeng, u Amit Shah, u la leit jngoh ïa ka ïing sah jong u Bikramjit Singh ha Gurdaspur jong ka Punjab, ïa uba la pynshisha ba u la shah pynïap hadien ba u la pynmih ïa ka sur pyrshah ïa ka jingkhaïi drok, bad u la ïakynduh ïa kiba haïing jong u, hapdeng ka jingsngewkhia kaba nang jur halor ka jingkhaïi drok bad ka suk ka saiñ ha kane ka jylla ba shaphang Shatei.
Ha kane ka jingleit jong u sha Punjab, u Shah u la buh por ban ïakynduh ïa ki bahaïing jong ki briew kiba dang shen ki la duh ei ïa la ka jong ka jingim kumba la pynshisha na ka daw ba ki kren pyrshah ïa ki nongkhaïi drok ha ki distrik Gurdaspur, Mansa bad Sangrur.
U Vice President ka BJP Punjab u Fatehjang Singh Bajwa u la ong ba kane ka jingwan jong u Shah ka pynsngew ïa ka khubor ba ka seng kan pyndep ïa ka jingkular ban rat dyngkhong ïa u drok na kane ka jylla.
“Tang khyndiat sngi shwa ha Jalandhar, ka BJP bad khamtam eh u Amit Shah ki la ai ka jingkular sha ki paidbah ka Punjab ba kin pynduh jait syndon ïa ka jingma jong u drok ha ka jylla, da kaba pynduh tynrai ïa ka haduh ka 31tarik Nohprah, 2029,” ong u Bajwa ha ka jingïakren bad ki nongthoh khubor.
U Shah hashwa kane u la pynpaw ka jingsngewlem sha ki longïing kiba la duh noh ïa kiba ïeid ba thoiñ jong ki hadien ba ki la pynmih ïa ka sur pyrshah ïa ka jingkhaïi drok beaiñ. U la ong ba ka jingsngewsih jong ki ka long kaba palat ïa ki kyntien bad u la pynskhem ba ka jingpyrshang ban pynsngap jar ïa kito kiba kren pyrshah ïa u drok kan ym urlong.
