Ki longiïng longsem ruh ka la hiar bad nanghiar ym tang na ka jingïadei para marjan-marpa, para shnong para thaw, hynrei wat na ka imlang ka sahlang ruh ka la troiñ mynta ha kylleng ki shnong ki thaw khamtam ha ki jaka kyndong ka ri. Naduh ka rukom leit rah u synñiang u byndei ha ka kam ïap u la sdang jah uba long ka jingïajan bad jingithuh ïa ki kur ki jait ba dang ïa jan bha na ka liang u kpa bad ka kmie. Kumta ka jingïa-sngewjan shi kur shi jait ka la jngai mynta. Kane ka rukom ba la buh ki tymmen ki san kim ju ieh noh ei namar ki long ba kynja Blei. Kumta ha ka pang ka shitom bad ki kam ïap hapdeng ki longiïng longsem ba dei na kajuh ka kur na ka rympei iïng u kpa bad ka kmie ki ju wanrah synniang da kaba ïa leit ai sniang, masi ne syiar ha kata ka ïing ba ïap.
Ka ïing kmie kha bad ki khun kim lah khlem da leit rah ruh u synñiang u byndei haba don ba ïap khamtam ki tymmen ha ka liang ki khun kha ne ka liang ka meikha. Kane ka rukom leit rah synñiang ka pynpaw shynna ba ki arliang kur ki dang don ka jingïateh kur ne ïa kynmaw burom iwei ïa iwei kum ka dak ka jingithuh kmie kha, khunkha, pakha. Hynrei mynta shipara trai ne shipara kha ruh kim don shuh ka jingïasngewjan ne ïa tylli bad ïa burom kum ha ki por mynshuwa. Mynta ki longiïng longsem ki la pait la pra ki la ïa kiar bad ïaleh jngai ym shuh ka jingïa burom markylliang bad kim don shuh ka rukom leit rah u synñiang u bynhei. Ki shu leit sngewlem kum ka rukom jingïadei para kur para jait. Kane ka jingkylla ka pynduh bad pynjah noh ïa ka dustur ka riti barim bajah kiba ïa prat lynti naduh nyngkong ïa ka jingïaieit bad ïajan hapdeng ka kur u kpa bad ka kur ka kmie. Mynta kim da pushe shuh para kur para jait ruh. Wat shipara trai ruh ki la ïa leh jngai khamtam ha ki khun ki ksiew pateng la pateng kim don shuh ka jingïasngew jan bad ïa ieit hapoh ka kur ka jait.
C. B. Iawphniaw
