Lucknow, Naiwieng:
Ka ïingbishar ha Ambedkar Nagar, ka la hukum ban plie biang ïa ka mukotduma halor ka jingïap jong u koidi ha kti jong ki pulit u Ziauddin ha u snem 2021, uba la khlad ha ka por ba u la shah set patok ha ki pulit, ha kaba 8 ngut ki pulit, ki la shah kynnoh ba ki la don kti ha ka kam pynïap briew, namar ka jingbym lah jong ki ban pyndep ne pynbiang ïa ka jingtohkit.
Ka ïingbishar ka la hukum ban plie biang ïa kane ka mukotduma, kaba ïadei bad uwei u rangbah uba la 36 snem ka rta, u Ziauddin, uba la khlad noh ha ka por ba u la shah set patok ha ki pulit ha u snem 2021.
U Chief Judicial Magistrate (CJM), u Sudha Yadav, u la pynpaw ïa ka jingsngewkhia ba ka jingtohkit kaba ha shwa ka la paw ba kam shym la dep bad bakla.
Ha kaba ïadei bad ka hukum jong ka ïingbishar, u CJM Yadav, u la kyntait ïa ka jingpynshisha jong ki pulit, ba u Ziauddin, u la ïap na ka jingpang ba don jingthut u dohnud, da kaba kdew ïa ki dak jingmynsaw kiba paw bha ïa kiba la lap ha ka met jong u.
Ka la kdew ba ha ka rta kaba 36 snem, ym shym la don kano kano ka sakhi kaba pyni ba u Ziauddin u don kino-kino ki jingshitom kiba pynpaw ba ki ktah ïa ka koit ka khiah jong u, bad ym shym la don ruh kano-kano ka jingpynpaw ba u la dih kyiad ne drok kiba lah ban long ki daw jong ka jingïap jong u.
“Ka jingtohkit ba la pynlong da ki pulit halor kine ki mat ka paw ba kam pat biang bad ka don jingduna,” la ong u CJM.
Ka jingïap jong u Ziauddin, ka la jia ha ka 24 tarik, Lber, 2021, ha ka por ba u dang shah set patok ha Sammanpur Police Station, ha kaba u la shah kem halor ka jingshah kynnoh tuh.
Hadien ka jingïap jong u, u hynmen jong u, u Shahabuddin, u la mudui da ka ejahar, kaba la pynlong ban buh da ka jingmudui mukotduma halor ka kam rahbor bad pynïap briew pyrshah ïa ki 8 ngut ki pulit na Sammanpur Police Station.
U Shahabuddin u la kynnoh ba u Ziauddin u la shah shoh ha ka por ba u dang don ha kti jong ki pulit.
U la kynnoh shuh shuh ba ka jingshitom jong u Ziauddin, ka la nang jur, ha kaba la pynlong ïa u ban shah sumar ha ka jaka sumar jong ka distrik, ha kaba u la khlad noh tang hadien katto katne por ba u dang shah sumar.
Wat la ki heh pulit ki la kyntait ba ki don kano kano ka jingleh bakla, hynrei ki dak jingmynsaw kiba jylliew kiba la lap ha ka por ba la khmih bniah ïa ka met ïap ki la pynmih ïa ka jingsuba kaba jur ha kaba ïadei bad ki kam runar jong 8 ngut ki pulit.
U CJM u la ong ba ha ka 2 tarik, Risaw, 2022, u ophisar tohkit jong ki pulit, u Birendra Bahadur Singh, u la pyllait ïa baroh ki ophisar ba shah kynnoh, da kaba pynshong nongrim ïa ka jingïap jong u Ziauddin halor ka jingpang dohnud.
Hadien kane ka jingpyllait, u Shahabuddin u la mudui da ka jingmudui pyrshah halor ka kaiphot kaba khatduh jong ki pulit.
U CJM u la pdiang ïa ka jingujor pyrshah jong u Shahabuddin bad u la weng noh ïa ka kaiphot ba khatduh jong u nongtohkit, da kaba ong ba ki pulit ki dei ban pynlong ïa ka jingtohkit kaba hok bad kaba khlem shahliang.
Ka la bthah ïa u heh pulit ha Ambedkar Nagar ban thung ïa u ophisar ha ka kyrdan Deputy Superintendent of Police ban khmih bniah halor kane ka jingtohkit ka bathymmai.
Katkum ka jingbthah jong ka ïingbishar, la thung ïa u Circle Officer, City, Akbarpur, u Devendra Maurya, kum u ophisar tohkit ba thymmai.
Kumba ka long mynta, baroh 8 ngut ki pulit kiba donkti ha katei ka jingïap briew hakti jong ki pulit ki dang shakri ïa ka kam hapoh ka tnat pulit, katba dang ap ïa ka jingtohkit kaba bniah halor kane ka bynta.
