Chennai, Naiwieng:
Ka Regional Meteorological Centre (RMC) ha ka Lah Sngi U Blei ka la ïathuh lypa ba kan sa don ka jinghap jong u slap bajur ha ki jaka kiba don ha kylleng khyndai tylli ki distrik kiba kynthup ïa ka Chengalpattu, Villuppuram, Cuddalore, Mayiladuthurai, Nagapattinam, Tiruvarur, Thanjavur, Pudukkottai bad Ramanathapuram ha ka 8 tarik bad 9 tarik, jong u Naiwieng.
Ka Puducherry bad ka Karaikal ruh ki lah ban ïoh ïa ka jinghap jong u slap uba jur ha kine ki sngi. Ki heh ka kynhun ba dei khmih halor ka jinglong jong ka suiñbneng ki la ong ba ka Chennai ka lah ban ïohpdiang shwa ïa ka jinghap jong u slap naduh ka 7 tarik, Naiwieng katkum ka jingshang tawiar jong ka erïong ha ki bynta jong ka Bay of Bengal ha kaba kane kan sa long sa sha ki jaka them.
Katkum ka jingïathuh jong ka RMC, la ong ba ki la don ar tylli ki jingshang tawiar jong ki erïong kumba ka long mynta, kawei ka dei ha ki bynta ba shaphang Shathie-Mihngi jong ka Arabian Sea sharudnong jong ka Kerala bad kawei pat ha ki bynta ba shaphang Shathie-Mihngi jong ka Bay of Bengal.
Ka jingïaid lyngba jong ka jingtawiar ka erïong ha ki bynta ba shaphang Shathie Mihngi jong ka Bay of Bengal sha ka bynta ba shaphang Shathie jong ka Tamil Nadu, ha kaba kane ka la nangjur da 3.1 km na sla duriaw.
Ka RMC ka la ong ba ka jinghap jong u slap uba jur kan sa long ha ki katto katne tylli ki jaka kiba kynthup ïa ka Tiruvarur, Mayiladuthurai, Nagapattinam, Thanjavur, Pudukkottai, Sivaganga, Madurai, Theni, bad Virudhunagar distrik ha kaba ka jinghap slap ha kine ki jaka kan sa long ha ka 10 tarik, Naiwieng.
