Imphal, Naiwieng:
Ka Indian National Congress (INC), ka la pdiang sngewbha ïa ka jingwan jong ki dkhot bathymmai, ha kaba 12 ngut ki nongïalam, ba kynthup ïa 2 ngut ki MLA barim, ki la pynïasoh bad ka seng ha Manipur ha ka Sngi Thohdieng.
Ha ka jingpdiang burom kaba la long ha Congress Bhavan, u Myntri Rangbah barim ka jylla bad u nongïalam ka Congress Legislative Party (CLP) u Okram Ibobi Singh u la ai ka jingpdiang sngewbha ïa ki MLA barim u Kh. Loken bad u Kikonbou, kiba la long napdeng kiba la shah pynrung dkhot.
Kane ka jingïalang ka la pynpaw ïa ka jingpyrshang jong ka Congress ban pynkhlaiñ ha ka ban kyntiew ïa ki kyrdan jong ka katba ka dang pynkhreh ban ïakhun pyrshah ïa ka seng BJP kaba bat ïa ka jingsynshar ha Manipur.
Haba ai jingkren ha kane ka jingïalang, u Ibobi Singh u la kynthoh tyngeh ïa ki sorkar Bharatiya Janata Party (BJP) ha baroh ar kata ha ka jylla bad ha ka ri.
U la kynnoh ba ka BJP kam lah ban weng ïa ka jingeh kaba dang ïai bteng ha Manipur bad ka la pynmih ïa ka jingkulmar ha kylleng ka ri.
“Naduh ba ka BJP ka la shim ïa ka bor, ka shongsuk-shongsaiñ ka la khyllem. Ka jingsynshar jong ka BJP ka la wanrah ïa ka jingïapher bad jingkulmar ha ka kyrteng jong ka niam, ka ktien, bad ka jinglong kyrpang,” u la ong, da kaba kynnoh ïa ka jingsynshar jong ka BJP ba ka la pynmih ïa ka jingbym ïa sngewthuh jingmut bad ka jingtieng jingsyier hapoh ki jaitbynriew jong ka jylla Manipur.
U Ibobi u la pynpaw shuh shuh ïa kaei kaba u la batai kum ka jingknieh bor synshar kaba long pyrshah ïa ka synshar paidbah jong ka BJP ha ka ilekshon ha ka jylla ha u snem 2017.
Wat la ka Congress ka la jop 28 na ki 60 tylli ki konstitwensi, hynrei la ïathuh ba u Lat jong ka jylla ha katei ka por, u la khot ïa ka BJP, kaba don tang 21 tylli ki konstitwensi ba kan thaw ïa ka sorkar.
“Ka jingbthah ka long kaba shai na ka bynta ka Congress, hynrei ka BJP ka la pyndonkam ïa ka jingsynshar ka seng kmie ban shim ïa ka bor synshar, da kaba pynduhjait ïa ka jingjied jong ka mon u paidbah,” u la pynshisha, da kaba kynnoh ba ka BJP ka la ïaid lait ïa ki kyndon jong ka Riti synshar ka ri.
U la ïaid shakhmat ban kynthoh ïa ka sorkar ba la ïalam da ka BJP namar ba kam shym la pynlong ïa ka ilekshon Local Body, da kaba kynnoh ba ïa ka khlam la pyndonkam kum ka daw ban pynslem ïa ki ilekshon khlem buh por katba kiwei pat ki jylla ki la lah ban pynlong ïa ka ilekshon.
Ha ka jaka jong kata, u Ibobi u la ong ba ka BJP ka la thung ïa ki nongpynïaid ban peit ïa ki Zilla Parishad bad Panchayat, la kynnoh ba ki pyndonkam bakla ïa ka pisa jong ka Finance Commission.
“Kane ka sorkar kam ngeit ha ka synshar paidbah; ka treikam kum ka jingsynshar donbor,” u la kynnoh, da kaba maham ba ka BJP ka lah ban pyrshang ïa ki buit kiba kum kita ban pynsahteng ïa ka General Election.
U Ibobi u la pynskhem biang ruh ïa ka jingkular jong ka Congress ban ïada ïa ki jinglong jong ka synshar paidbah, da kaba kular ba lada shah jied, ka seng kan buh hakhmat eh ïa ka jingpynlong mardor ïa ki ilekshon jong ki bor synshar shnong.
“Lada ka Congress kan thaw sorkar, yn pynlong ïa ka ilekshon na ka bynta ki Autonomous District Council (ADC) bad ki Gram Panchayat hapoh lai bnai”, u la kular, da kaba pyni ïa ka jingkular ban pynïoh biang kloi ïa ki rukom synshar paidbah.
U la pdiang sngewbha ïa ki dkhot ka seng Congress kiba wanphai biang kiba kynthup ïa u Kh. Loken, bad u Kikonbou, da kaba khot ïa ka kum ka “jinglehniam ban wan phai sha la ïing” bad da kaba kdew ba bun ki nongïalam kiba la mih noh hapoh “ki jinglong bym lah ban kiar” mynta ki wanphai biang ban pynkhlaiñ ïa ka jingthmu jong ka seng ban pynioh biang ïa ka jingsuk ha Manipur.
Kum shi bynta ban pynkynmaw biang ïa ka jingthmu jong ka Congress na ka bynta ka shong shngaiñ bad ka roi ka par, u Ibobi u la pynskhem da kaba ong ba tang ka Congress ka don ïa ka jingshemphang bad ka jingaiti kaba donkam ban wanrah biang ïa ka jingïatylli ha ka jylla.
Da ka jingkyrshan bathymmai bad ki nongïalam ba rangbah kiba wanphai biang, u la pynpaw ïa ka jingsngewskhem ba ka Congress kan lah ban ïakhun pyrshah ïa ki rukom pyntreikam jong ka BJP bad ban ïalam ïa ka Manipur sha ka shongsuk-shongshngaiñ bad ka jingkiew shaphrang.
