Imphal, Naiwieng:
Ka sorkar Manipur ka la pyllait ïa ka pisa kaba T.5.88 klur sha ki 58,863 ngut ki briew kiba dei ki nongshong shnong jong ka ri kiba la kylla poiwir hapoh ka ri hashwa ka tamasa Diwali bad Ningol Chakouba, da kaba ai T.1,000 shaman ki nongïoh myntoi kiba dei hok.
Ïa kane ka jingïarap ba kyrpang, kaba long T.5,88,63,000, la pyllait na ka State Emergency Fund bad la ai lyngba ka Direct Benefit Transfer (DBT) ha ka 8 tarik Naiwieng.
Ïa kane ka pisa la pynpoi lyngba ka Real Time Gross Settlement (RTGS) system sha ki Bank Account ba la buh kyrpang jong ki Deputy Commissioner ha ki 10 tylli ki District – Imphal West, Churachandpur, Imphal East, Thoubal, Ukhrul, Kakching, Kangpokpi, Tengnoupal, Jiribam bad Bishnupur.
La bthah ïa ki Deputy Commissioner ba kin pynthikna ïa ka jingsam ïa ki jingïarap ha ka por kaba biang sha ki nongioh jingmyntoi kiba dei hok hadien ba la pyndep ia ka jingpynshisha kaba donkam.
Ki dkhot jong ka jaitbynriew kiba la kylla phetwir hapoh ka ri, ki la pynpaw ka jingsngewnguh ïa ka sorkar jylla, kaba la ïalam da u Myntri Rangbah ka Jylla, u Yumnam Khemchand Singh, kaba la pynjlan ïa ka jingïarap pisa ha kane ka aïom lehkmen.
Ha kajuh ka por, u Myntri Rangbah ka jylla u Khemchand Singh u la ai khublei Diwali ïa ki paidbah ka Manipur, da kaba kitbok kitrwiang ïa ki ba kin ïoh ïa ka jingkmen, ka jingkoit jingkhiah bad ka jingkyrmen kaba thymmai.
Ha ka khubor jong u, u la pynpaw ka jingkyrmen ba kane ka tamasa kan wanrah ïa ka jingsuk bad ka jinglong babha ha ki longïing ha kylleng ka jylla.
U la khot ruh ïa ki briew ban pynthymmai ïa ka jingangnud jong ki na ka bynta ka jingsuk, ka jingkiew shaphrang bad ka roi ka par ha Manipur.
