Itanagar, Naiwieng:
Ka Arunachal Pradesh BJP ka la kyrshan jur ïa ka Special Intensive Revision (SIR) ïa ki thup kyrteng thep vote, da kaba batai ïa kane kum ka jingpyntreikam katkum ka Riti synshar bad ka aiñ kaba donkam ban pynthikna ïa ki thup nongthep vote kiba thikna bad ban ïada ïa ki jingmyntoi jong ki trai ri trai muluk jong ka jylla.
Haba ai jingkren ha ka jingïalang bad ki nongthoh khubor ha ophis treikam ka BJP ha jylla, u president ka seng ha ka jylla u Kaling Moyong u la ong ba kane ka jingpynkylla thymmai ka long kaba kongsan ban ithuh bad weng ïa ki bym dei hok na ki thup thep vote bad ban peit bniah ïa kaei kaba u la batai kum ka jingwan rung ki briew kiba nabar bad ka jingwan buhai shnong beaiñ.
U Moyong, ryngkat u nongaiktien ka BJP uba dei ruh u MLA ka Roing, u Mutchu Mithi, u la ong ba kane ka jinglehkai kan ïarap ban ïada ïa ka jingmyntoi jong ki jaidbynriew riewlum ha kajuh ka por ban pynthikna ïa ka jingpynmih elekshon kaba laitluid, kaba hok bad kaba shai.
U la pynskhem ba ïa ka rukom treikam jong ka SIR la pyniaid da ka aiñ bad ka long kaba donkam ban ïada na ka jingshah ktah ha ki thup nongthep vote ha ki nongthep vote ki bym dei hok.
Ka BJP ka la ïalap ban kyrshan ïa katei ka jingpynkylla ha kylleng ka jylla, kynthup lyngba ki jingïalang bad ki nongthoh khubor ha Itanagar bad ki jingïalang paidbah kum ka jingïalang ‘Loktantra Bachao’ ha Ziro, ban batai ïa katei ka jinglehkai bad ka jingkordor jong ka.
Halor ka jingthmu jong ka Siang Upper Multipurpose Project (SUMP), u Moyong u la kren halor ka jingsngewkhia halor ka jinglah ban pynkynriah jaka ïa ki jaitbynriew ha ka thaiñ Siang lada pyntreikam ïa ka projek bording heh.
U la ong ba ka Pre-Feasibility Report (PFR) kan ai ïka dur kaba kham shai halor ka jinglah ban treikam jong ka projek bad ki jingktah kiba lah ban mih na ka. Ka sorkar jylla kan ym ïaid shakhmat ïa kane ka projek lada ka kaiphod ka shem ba kam lah ban leh, u la ong.
U Moyong u la ban jur ruh ba ka jingmynjur jong ki paidbah kan long ka nongrai ban rah ïa ka projek shakhmat.
Ka SUMP ba la thmu ka la mad ïa ka jingpyrshah na ki bynta jong ki nongshong shnong bad ki sengbhalang ha Arunachal Pradesh, khamtam eh halor ki jingsngewkhia kiba ïadei bad ka jingshah pynkynriah jaka, ka jingktah ïa ka mariang bad ka lawei jong ki jaka shong jaka sah jong ki trai ri trai muluk ha ka thaiñ Siang.
Kane ka jingkren jong u Moyong ka wan hapdeng ka jingïakren kaba dang ïai bteng halor ka jinglah ban pyntreikam ïa ka projek bad ki jingsngewkhia jong ki paidbah kiba lah ban shah ktah na ka jingpyntreikam ïa ka.
