Guwahati, Naiwieng:
Ka jingïap jong ki briew na ka jingjia jong ka jingpluh jong kawei ka karkhana jong ka Oil India Ltd (OIL) ha Dibrugarh district jong ka Assam, ka la kiew sha ka saw ngut, ha kaba uwei pat u nongtrei uba la mynsaw, u la khlad noh ha ka sngi U Blei, ong u heh sorkar.
Lai ngut kiwei pat kiba la mynsaw ruh ha ka jingpluh jong ka ding ha ka sngi Thohdieng ki dang shah sumar bad kine ki don ha ka jingshitom kaba jur bha.
Uwei u briew u la khlad noh ha ka ding ha ka sngi ba jia katei ka jingjia, katba arngut ki la ïap ha ka sngi kaba bud.
Uwei u Mechanical Helper, ïa uba la tip kyrteng kum u Sailen Gogoi, uba dang shah sumar ha kawei ka hospital shimet hangne, u la khlad noh ha ka por mynsngi, kaba la pynkiew ïa ka jingïap sha ka saw ngut, ong utei u heh sorkar.
Baroh kiba la ïap ha ka jingjia, ki dei ki nongtrei jong ka Spectron Engineering Private Limited, kaba dei jong ka kompeni kaba don ha Mumbai, kaba la thungkam da ka OIL.
Ka ding ka la pluh ha ka 6 tarik u Naiwieng hadien ka jingbthei ha ka por ba maramot ïa ka jaka shna tank ba hapdeng jong ka OIL ha Tengakhat, la ong ka tnad treikam paidbah ha ka kyrwoh.
Ka jaka buh umphniang ba pdeng ka dei ka jaka ha kaba la buh shipor ïa ka umphniang ha ki tank shwa ban pynkynriah ban pyntreikam ne kit shawei pat.
Ka PSU ka la pynbna ban ai jingkyrshan pisa kaba T. 10 lak sha kiba haïing hasem jong uwei pa uwei uba la khlad noh, bad T.5 lak sha uwei pa uwei uba mynsaw.
U Myntri ka sorkar pdeng u Sarbananda Sonowal bad u Myntri Rangbah ka jylla u Himanta Biswa Sarma ki la buddien bha ïa kane ka jingjia, la ong ka PSU ha ka sngi Saitjain.
U Sonowal uba dei u MP ka Lok Sabbha na Dibrugarh u la phone ïa u CMD ka OIL u Ranjit Rath ban shim jingkheiñ ïa ka jinglong jingman.
U Sarma u la bthah ïa u Principal Secretary jong u ban ïakynduh ïa u Chairman-cum-Managing Director jong ka OIL ban pynthikna ïa ka jingsumar kaba bha tam na ka bynta kiba mynsaw bad ka jingsiew bai lutksan kaba biang na ka bynta ki longïing jong kito kiba la ïap ha ka jingjia.
